ԵՐԵՎԱՆ, 29 նոյեմբերի — Sputnik. 2019թ.–ի փետրվարից Հայաստանի գյուղացիական տնտեսությունները հնարավորություն կունենան օգտվել գյուղատնտեսական ապահովագրության համակարգից` ՆԱՌՄԱՆ–ից, որն, ինչպես այսօր լրագրողների հետ զրույցում նշեց գյուղնախարարի պաշտոնակատար Գեղամ Գևորգյանը` «նույն ԱՊՊԱ–ն է գյուղատնտեսության ոլորտում»։
Ապահովագրության նոր համակարգը պիլոտային ծրագրով կներդրվի առայժմ միայն 2-3 մարզերում և միայն 1-2 բուսատեսակների ցանքատարածքների նկատմամբ։
«Առաջին փուլում կապահովագրվեն ծիրանը, խաղողը, այն մշակաբույսերը, որոնք ամենաշատն են վնասվում կարկտահարությունից, ցրտահարությունից»,– ասաց Գևորգյանը։
Ծրագրի առաջին մի քանի տարիներին գյուղացիների վճարած ապահովագրական գումարները սուբսիդավորվելու են պետության կողմից։ Ըստ նախարարի`գումարի 60-65 տոկոսը կսուբսիդավորվի պետական բյուջեից։ Գյուղացին մոտավոր հաշվարկով կվճարի 30-35 հազար դրամ։
Ծրագիրը կազմվել է 1.5 տարի առաջ, դեռ նախորդ իշխանությունների և KFW գերմանական բանկի համաֆինանսավորմամբ։
«Մենք 5 տարվա գումար ենք նախատեսել, որպեսզի հավաստիացնենք մեր գործընկերներին, որ ծրագիրը լինելու է շարունակական, պետությունը 1 տարով չի սահմանափակվելու»,– ասաց նախարարը։
Ծրագրի միայն փորձնական ներդրման համար պետական բյուջեից հատկացվելու է շուրջ 360 մլն դրամ։
Նախապես հայտարարվում էր, որ ապահովագրական այս ծրագիրը կմեկնարկի արդեն այս տարեվերջին։ Նախարարի պաշտոնակատարն ուշացումը վտանգավոր չի համարում` հիշեցնելով, որ գյուղատնտեսական աշխատանքները մեկնարկելու են միայն փետրվարից հետո։
Նշենք, որ այսօր կառավարության նիստում գյուղնախարարը հայտարարել էր, որ 2018թ.–ի ընթացքում բնական աղետներից գյուղատնտեսությունը 9.8 մլրդ դրամի վնաս է կրել։
Համեմատության համար նշենք, որ 2017թ.–ին վնասը շուրջ 12 մլրդ դրամ է հաշվարկվել, 2016-ին` 32 մլրդ։
