ԵՐԵՎԱՆ, 29 նոյեմբերի — Sputnik. Դեկտեմբերի 7-ի աշխատանքային օրը կտեղափոխվի դեկտեմբերի 15-ի շաբաթ օրը, բայց ոչ թե ամբողջ հանրապետության տարածքում, այլ միայն Շիրակի և Լոռու մարզերում։
Նման որոշում այսօր կայացվեց ՀՀ կառավարության նիստում։
Նախագծի ընդունումը նպատակ ունի հնարավորություն ընձեռել այդ մարզերի քաղաքացիներին դեկտեմբերի 7-ին այցելելու երկրաշարժից զոհված իրենց հարազատների շիրիմներին։
Իսկ թե ինչու միայն երկու մարզերում հարցի շուրջ պարզաբանում ներկայացրեց առաջին փոխվարչապետի պաշտոնակատար Արարատ Միրզոյանը։
«Ձևավորված ավանդույթի համաձայն` այս երկու մարզերում մարդիկ միևնույն է աշխատանքի չեն գնում։ Պետք է հարգել այդ մարդկանց կարծիքը»,- ասաց նա։
Հիշեցնենք, որ դեկտեմբերի 7–ին լրանում է Սպիտակի ավերիչ երկրաշարժի 30 տարին։
