ԵՐԵՎԱՆ, 27 նոյեմբերի — Sputnik. Հայաստանում կադաստրային ծառայությունների գները բարձր չեն։ Նման կարծիք այսօր լրագրողների հետ հանդիպմանը հայտնեց ՀՀ անշարժ գույքի կադաստրի կոմիտեի ղեկավար Սարհատ Պետրոսյանը։
«Առաջին հայացքից կարող է թվալ, թե գները գուցե և բարձր են, բայց դրանք օբյեկտիվ են։ Դրանց շնորհիվ կադաստրն այն եզակի պետական կառույցներից է, որ ամբողջությամբ ինքնաֆինանսավորվում է»,– ասաց Պետրոսյանը։
Նա նաև շեշտեց, որ կառավարությունը կարող էր պոպուլիստական քայլ անել` առաջարկելով իջեցնել գները, բայց դրանից հետո կադաստրը ստիպված կլիներ դիմել կառավարությանն ու իր ծախսերի համար լրացուցիչ գումար պահանջել բյուջեից`իր ծախսերը դնելով ոչ միայն անշարժ գույքի գործարք կատարողների, այլ բոլոր հարկատուների վրա։
Այդուհանդերձ, կադաստրի կոմիտեի ղեկավարը չբացառեց, որ բարեփոխումների արդյունքում գները կարող են իջեցվել, քանի որ էլեկտրոնային համակարգի անցնելուց հետո շատ տարածքային գրասենյակներ կփակվեն, դրանց աշխատակիցները` կկրճատվեն։ Բայց այս գործընթացի առաջին արդյունքները կնկատվեն միայն 5 տարի հետո։
Նշենք, որ Երևանում անշարժ գույքի նկատմամբ բոլոր գրանցված սահմանափակումների վերաբերյալ տեղեկատվության տրամադրումն արժե 5000 դրամ, գյուղատնտեսական նշանակության հողամասի նկատմամբ` 500 դրամ։ Անշարժ գույքի նկատմամբ սեփականության վկայականի տրամադրումն արժե 25000 դրամ։ Սեփականության վկայականի կրկնօրինակի տրամադրումն արժե 5000 դրամ։ Կադաստրային քարտեզների տեղեկատվության տրամադրումը`300 000 դրամ,արդեն տրամադրված քարտեզների յուրաքանչյուր թարմացումը` 50 000 դրամ։
