ԵՐԵՎԱՆ, 26 նոյեմբերի — Sputnik. Կերչի նեղուցում ուկրաինական ՌԾՈւ–ի սադրանքը կազմակերպվել էր առնվազն երկրի բարձրագույն ղեկավարության «բարեհաճությամբ» կամ գուցե նաև անմիջական հրամանով, հայտարարել է Ռուսաստանի ԱԳՆ ղեկավար Սերգեյ Լավրովը։
«Գուցե, երբ ուկրաինական կողմը ծրագրում էր այդ սադրանքը, իսկ այն, որ դա արվել է առնվազն երկրի բարձրագույն ղեկավարության «բարեհաճությամբ», կամ գուցե նաև անմիջական հրամանով, որևէ մեկը չի կասկածում, նրանք այլ շահեր էին ակնկալում», – հայտարարել է նախարարը երկուշաբթի հրավիրված մամուլի ասուլիսի ժամանակ։
Լավրովի խոսքով` Կիևը հաշվարկել էր, թե ինչ օգուտ կարելի է քաղել այս իրավիճակից` հույս ունենալով, որ ԱՄՆ–ն և Եվրոպան կսատարեն սադրիչներին։
«ՄԱԿ–ում տարածած իրենց գրության մեջ գոնե ինչ-որ փաստեր ներկայացնելը, հավանաբար, պակաս կարևոր չէր նրանց համար։ Այնպես որ ինձ դժվար է ասել, թե ինչ մտքեր էին պտտվում նրանց ուղեղներում, երբ ծրագրում էին այդ սադրանքը և ինչի էին ուզում հասնել` իրենց քաղաքականությունն առաջ տանելու առումով», – հայտարարել է Լավրովը, նշելով, որ նրանց վարած քաղաքականությունը «ռադիկալ–նացիոնալիզմի» ճանապարհով է գնում։
Ռուսաստանի ԱԳՆ ղեկավարն ավելացրել է, որ խախտումը բավական վտանգավոր մեթոդներով է տեղի ունեցել` մանևրումներ կատարելով նեղ նեղուցում, ինչը կարող էր սպառնալիք և վտանգ ստեղծել նավերի նորմալ երթևեկության համար ծովային այդ տարածքում։
Ընդ որում, նա ուկրաինական կողմին կոչ է արել «իրենց մի քիչ ադեկվատ պահել, քանի որ նույնիսկ Կիևի արևմտյան հովանավորներն են երբեմն անհարմար զգում նրանից, թե իրենց շահերի համար ինչ մտքեր են ծնվում ուկրաինական ղեկավարների գլուխներում»։
«Խստորեն կոչ ենք անում Կիևի արևմտյան հովանավորներին զսպել նրանց, ովքեր հիմա Ուկրաինայում սպասվող ընտրությունների կամ այլ իրադարձությունների ֆոնին ռազմական հիստերիայի վրա փորձում են քաղաքական միավորներ վաստակել», – ասել է Լավրովը։
Ինչպես հայտնել են Ռուսաստանի Անվտանգության դաշնային ծառայության հասարակական կապերի կենտրոնից, Ուկրաինայի ռազմածովային ուժերի՝ Ռուսաստանի պետական սահմանը խախտած «Բերդյանսկ», «Նիկոպոլ» եւ «Յանի Կապու» նավերը ՌԴ-ի տարածքային ծովի սահմաններում ապօրինի գործողությունների փորձ են իրականացրել: ՌԴ-ի Անվտանգության դաշնային ծառայության սահմանապահ բաժնի և ՌԴ-ի Սեւծովյան նավատորմի՝ ուղեկցող նավերի և կատերների՝ անհապաղ կանգ առնելու օրինական պահանջներին չեն արձագանքել, կատարել են վտանգավոր խուսավարում: Ուկրաինական ռազմանավերի հարկադիր կանգնեցման նպատակով կիրառվել է զենք: Արդյունքում` Սև ծովում ՌԴ-ի տարածքային ջրերում Ուկրաինայի ռազմածովային ուժերի բոլոր երեք նավերն էլ կալանվել են: Ուկրաինայի զինված ուժերի երեք վիրավոր զինծառայողներին բժշկական օգնություն է ցուցաբերվել: Նրանց կյանքին վտանգ չի սպառնում:
Ուկրաինայի զինված ուժերի միավորումներն ու զորամասերը Գլխավոր շտաբի պետի որոշմամբ «լիակատար» մարտական պատրաստության վիճակի են բերված: Ուկրաինայի Ազգային անվտանգության և պաշտպանության ծառայությունը երկրում 60 օր ժամկետով ռազմական դրություն է սահմանել:
