ԵՐԵՎԱՆ, 26 նոյեմբերի — Sputnik. ՀՀԿ փոխնախագահ Արմեն Աշոտյանը ֆեյսբուքյան իր էջում պատասխանել է Նիկոլ Փաշինյանին, ով, Աշոտյանի խոսքով, «անդրադարձել է իր համեստ անձին ու իմ խոսքերին»։
«Նախ և առաջ թույլ տվեք ևս մեկ անգամ փաստել, որ Հանրապետականը միակ ընդդիմադիր ուժն է, ինչը ապացուցում է նաև Նիկոլ Փաշինյանը՝ իր բոլոր քարոզարշավային ելույթները կառուցելով մեզ քննադատելու շնորհիվ։
Ապրեք պարոն Փաշինյան, որ լիովին անվճար զբաղվում եք ՀՀԿ-ի բրենդով՝ սև սպիտակ գույներով ու մեր թեկնածուների մասին հանրությանը հիշեցնելով, բայց խորհուրդ եմ տալիս Ձեզ մեկ պահ հիշել նաև, որ Դուք ՔՊ կուսակցություն եք ներկայացնում ու հիմա իրականացնում եք «Իմ քայլը» դաշինքի քարոզարշավը, մի քիչ էլ ձեզնից պատմեք ու ձեր ծրագրերից»,–գրել է Աշոտյանը։
Նա խորհուրդ է տվել Փաշինյանին ժամանակից շուտ քաղաքական դիակներ չփնտրել ու հիշել, որ քաղաքական դիակներով շրջապատված չլիներ, հիմա նրա հետնաբեմում կանգնած չէր լինի միայն պարոն Պապիկյանը. «Ավելի լավ է 11 տարի հետո, ինչ-ինչ հանգամանքներում «քաղաքական դիակ դառնալ» քան 8 ամսում հասկանալ, որ քաղաքական դիակներով ես շրջապատված։
Բարի ճանապարհ Ձեզ, զգույշ կլինեք՝ սևից ու սպիտակից հեռու»,–գրել է Աշոտյանը և օգտագործել #vote1 #voteAshotyan հեշթեգը։
Հիշեցնենք, որ Արթիկում «Իմ քայլը» դաշինքի քարոզարշավին ՀՀ վարչապետի պաշտոնակատար Նիկոլ Փաշինյանը, անդրադառնալով Արմեն Աշոտյանի այն հայտարարությանը, որ դեկտեմբերի 9-ին անակնկալ է սպասվում, ասել էր. «Ես գիտեմ ինչ անակնկալ է: Դեկտեմբերի 9-ին պարզվելու է, որ նույնիսկ իրենց տնեցիք իրենց չեն քվեարկել»:
