ԵՐԵՎԱՆ, 23 նոյեմբերի – Sputnik. Այս տարի լավագույն մարզիկի ընտրություն, որպես այդպիսին, չի լինելու, լինելու է Հայաստանի մարզիկների լավագույն տասնյակի ընտրություն: Այսօր հրավիրված ասուլիսի ժամանակ այս մասին ասաց սպորտի և երիտասարդության հարցերի նախարարի ժամանակավոր պաշտոնակատար Գաբրիել Ղազարյանը։
Այսինքն նշանակություն չի ունենալու, թե ով է լինելու լավագույն տասնյակի առաջին կամ տասներորդ տեղերում: Բնականաբար, լավագույն տասնյակում տեղ գտած մարզիկները ընտրվելու են ըստ իրենց ցույց տված արդյունքների:
Փոխվել է նաև ընտրողների ցանկը: Բացի մարզական լրագրողներից ու SMS հաղորդագրություն ուղարկողներից, այս տարի լավագույն տասնյակ ընտրելու գործընթացին մասնակցելու են նաև Հայաստանի հավաքական թիմերի գլխավոր մարզիչները:
Արդյո՞ք SMS հաղորդագրությունները չեն խանգարում լավագույն մարզիկների ընտրության գործում։ Այս հարցին պատասխանելով` Ղազարյանը նշեց, որ ամեն դեպքում սպորտի նախարարությունը պետք է ունենա հանրության կարծիքը ու հաշվի նստի դրա հետ:
Հիշեցնենք` 2017 թվականին լավագույն տասնյակի ընտրության ժամանակ SMS հաղորդագրությունները մեծ դերակատարում ունեցան լավագույն տասնյակի ձևավորման գործում: Որոշ մարզիկներ ավելի բարձր դասակարգում ունեցան հենց բազմաթիվ SMS-ների շնորհիվ: Այդ պատճառով էլ 2018 թվականին քվեարկությանը միանալու են հավաքական թիմերի գլխավոր մարզիչները:
