ԵՐԵՎԱՆ, 22 նոյեմբերի — Sputnik. Ռուսաստանի ԶՈւ–ն երկրորդ տեղն է զբաղեցրել Business Insider հրապարակած` աշխարհի ուժեղագույն բանակների վարկանիշում։
Ինչպես փոխանցում է ՌԻԱ Նովոստին, փորձագետները հաշվի են առել ավելի քան 50 ցուցանիշ, այդ թվում առկա սպառազինության տեսակների բազմազանությունը, մոբիլիզացիոն ներուժը, արդյունաբերության զարգացման մակարդակը, բնական ռեսուրսներն ու այլ գործոններ։ Առավելություն են ստացել միջուկային գերտերություններն ու ՆԱՏՕ–ի անդամները։ Դեպի ծով ելք չունեցող երկրներում նավատորմի բացակայության համար միավորներ չեն հանվել։
Վարկանիշի առաջատարը ԱՄՆ–ն է։ Միացյալ Նահանգների զինծառայողների քանակը մոտ 2 մլն է (գործող և պահեստազորային)։ Բանակում շուրջ 6 հազար տանկ կա, 13 հազարից մի փոքր ավել ինքնաթիռ, որոնց թվում մոտ երկու հազարը կործանիչներ են, 415 նավեր։ ԱՄՆ պաշտպանական բյուջեն 647 միլիարդ դոլարի է հասնում։
Երկրորդ հորիզոնականը զբաղեցրել է Ռուսաստանի բանակը, որն ավելի քան 3.5 մլն մարդ է ներառում։ Պորտալի տվյալներով Ռուսաստանի ԶՈւ–ում շուրջ 4 հազար ինքնաթիռ, ավելի քան 20 հազար տանկ և 352 նավ կա։ Business Insider–ը նշում է, որ ռազմական բյուջեն 47 միլիարդ դոլար է կազմում։
Երրորդը Չինաստանն է։ Չինաստանի բանակում ավելի քան 2.5 միլիոն մարդ է ծառայում, իսկ ռազմական ինքնաթիռների քանակը գերազանցում է 3 հազար միավորը։ Ժողովրդա–ազատագրական բանակն ավելի քան 7.5 հազար տանկ և 714 նավ ունի։ Ռազմական բյուջեն 151 միլիարդ դոլար է կազմում։
Վարկանիշի տասնյակում են նաև Հնդկաստանը, Ֆրանսիան, Մեծ Բրիտանիան, Հարավային Կորեան, Ճապոնիան, Թուրքիան և Գերմանիան։
Վարկանիշը կազմելիս հաշվի են առել Global Firepower կայքի տվյալները։
