ԵՐԵՎԱՆ, 22 նոյեմբերի — Sputnik. ԵԱՏՄ անդամ երկրների շրջանակում Ավիացիոն պատահարների ու լուրջ միջադեպերի հետաքննման միջազգային բյուրոյի ստեղծման մասին համաձայնագիրը ստորագրվել է Մոսկվայում։ Այս մասին հայտնում է ՀՀ տրանսպորտի, կապի և տեղեկատվական տեխնոլոգիաների նախարարությունը։
Համաձայնագիրը ստորագրել են Ռուսաստանի տրանսպորտի նախարար Եվգենի Դիտրիխն ու ՀՀ տրանսպորտի, կապի և տեղեկատվական տեխնոլոգիաների նախարարի պաշտոնակատար Հակոբ Արշակյանը։
Համաձայնագրին հետագայում միանալու են Ղազախստանը, Ղրղըզստանը, Բելառուսը, բայց այն բաց է լինելու նաև այլ երկրների համար:
Այս պահին հետխորհրդային տարածքում ավիացիոն պատահարների հետաքննությամբ զբաղվում է Միջպետական ավիացիոն կոմիտեն (ՄԱԿ), որն իրականացնում էր նաև ռուսական արտադրության ավիատեխնիկայի սերտիֆիկացման գործառույթը, սակայն 2015 թվականին Ռուսաստանի կառավարությունն այդ գործառույթը փոխանցել էր այլ գերատեսչությունների։
Համաձայնագրով նախատեսվում է պատահարների և դեպքերի մասին տեղեկությունները փոխանակել Քաղաքացիական ավիացիայի միջազգային կազմակերպության հետ, հետաքննման հանձնաժողովի համար անհրաժեշտ սարքավորումներ ապահովել, հետաքննման մասնագետների ուսուցում ապահովել, թռիչքների անվտանգության խորհրդատվություններ ներկայացնել, տեխնիկական ու ֆինանսական պաշարներն արդյունավետ օգտագործել պատահարերի ու միջադեպերի հետաքննության նպատակներով։
