ԵՐԵՎԱՆ, 22 նոյեմբերի — Sputnik. Ակտիվիստների խումբը բողոքի ակցիա է կազմակերպել Երևանում կառավարության շենքի մոտ` պահանջելով օրենք ընդունել անչափահասների շրջանում նույնասեռականության քարոզչության մասին։
Փաշինյանն ավելի վաղ հայտարարել էր, որ Հայաստանում որոշ օղակներ շահարկում են ԼԳԲՏ թեման։
Ակտիվիստ Արմեն Ղուկասյանի կարծիքով` ԼԳԲՏ–ի մասին Փաշինյանի աղոտ հայտարարությունը բարենպաստ հող է ստեղծում այն մարդկանց համար, որոնք մտադիր են հասարակական ակցիաներ անցկացնել և համբուրվող նույնասեռականներով տեսանյութ նկարել։
«Մենք չենք պահանջում արմատախիլ անել այդ երևույթը։ Մենք պահանջում ենք արգելել քարոզչությունը։ Խնդրում ենք նաև, որպեսզի իրավապահները ստուգեն և վերահսկեն այն կազմակերպությունները, որոնք դրամաշնորհների միջոցներով զբաղվում են քարոզչությամբ», – նշեց նա։
Ավելի վաղ համացանցում տեսանյութ էր տարածվել, որում երկու երիտասարդներ համբուրվում են Երևանի հուշարձանների ֆոնին։ Տեղեկություն էր հայտնվել այն մասին, որ տեսանյութը ներկայացրել է հասարակական ակցիան, որն ընթացել է «Բարև, Երևան» և «Համարձակ քայլիր, Նիկոլ» կարգախոսներով, ինչը հրահրել էր բուռն հասարակական բանավեճեր։
Նույնասեռականության քարոզչության դեմ բողոքի ակցիայի մասնակիցները կառավարությանը նամակ են փոխանցել` իրենց պահանջներով։ Նրանք շուտափույթ պատասխան են ակնկալում։ Մինչ այդ նրանք կանցկացնեն ակցիաներ, մինչև կհասնեն բոլոր պատասխանու կառույցների արձագանքին։
«Մենք բոլորս գիտենք, որ ընթանում է ակտիվ քարոզչություն, և այն ֆինանսավորվում է արտաքին ուժերի կողմից։ Նրանք մտադիր են խեղաթյուրել ազգային արժեքները և վնաս հասցնել պետականությանը», – նշեց Ղուկասյանը` հավելելով, որ նման իրավիճակ նկատվում էր նաև նախորդ իշխանությունների օրոք։
Ավելի վաղ հաղորդվել է, որ 2018թ.–ի նոյեմբերի 15-18–ը Երևանում տեղի կունենա Արևելյան Եվրոպայի և Կենտրոնական Ասիայի ԼԳԲՏ քրիստոնյաների 11–րդ համաժողովը։ Կազմակերպիչը «Նոր սերունդ» մարդասիրական հասարակական կազմակերպությունն է։ Դա դժգոհություն էր առաջացրել քաղաքացիների շարքում։ Հայաստանի վարչապետի պաշտոնակատար Նիկոլ Փաշինյանը հանձնարարել է պարզել, թե ով, երբ և ինչու է ցանկանում ԼԳԲՏ համաժողով անցկացնել Երևանում։ Ավելի ուշ ոստիկանապետ Վալերի Օսիպյանը հայտարարել էր, որ համաժողովի անցկացումը նպատակահարմար չէ` հաշվի առնելով ռիսկերը և ելնելով անվտանգության նկատառումներից։
![Բողոքի ակցիա ընդդեմ ԼԳԲՏ քարոզի Բողոքի ակցիա ընդդեմ ԼԳԲՏ քարոզի - Sputnik Արմենիա](https://cdn.am.sputniknews.ru/img/1580/09/15800928_0:58:1500:1000_600x0_80_0_0_c97c46ea02a73285d450c61db2088426.jpg)
![Բողոքի ակցիա ընդդեմ ԼԳԲՏ քարոզի Բողոքի ակցիա ընդդեմ ԼԳԲՏ քարոզի - Sputnik Արմենիա](https://cdn.am.sputniknews.ru/img/1580/15/15801516_0:0:1501:942_600x0_80_0_0_d0cb0ed559d81ebb4d45e68347057bcb.jpg)
![Բողոքի ակցիա ընդդեմ ԼԳԲՏ քարոզի Բողոքի ակցիա ընդդեմ ԼԳԲՏ քարոզի - Sputnik Արմենիա](https://cdn.am.sputniknews.ru/img/1580/09/15800952_0:58:1500:1000_600x0_80_0_0_d2547c5c26cb3820c211926f54abff5c.jpg)
![Բողոքի ակցիա ընդդեմ ԼԳԲՏ քարոզի Բողոքի ակցիա ընդդեմ ԼԳԲՏ քարոզի - Sputnik Արմենիա](https://cdn.am.sputniknews.ru/img/1580/09/15800944_0:58:1500:1000_600x0_80_0_0_9b9888c1b844d82292c7849dee84bdfe.jpg)