ԵՐԵՎԱՆ, 22 նոյեմբերի – Sputnik. ՀՀ գլխավոր դատախազությունը շուրջ 150 փոքր ՀԷԿ-երում հայտնաբերել է խախտումներ, որոնք հիմնականում վերաբերում են հատկապես ջրաչափերի բացակայությանը: Այսօր կառավարության նիստում այս մասին հայտարարեց ՀՀ գլխավոր դատախազ Արթուր Դավթյանը։
Նա հայտնեց, որ այս փաստերը ներառվել են մեկ քրեական գործում։ Նախաքննությունը դեռ ընթացքի մեջ է։
«Ամբողջ խնդիրն այն է, որ մենք ոլորտի խնդիրներ ունենք, որոնցով կարելի է քրեական գործի արդյունքներին չսպասել և իրավական կարգավորումներով անցնել առաջ»,- ասաց Դավթյանը։
Դատախազը նաև հայտնեց, որ մինչ օրս Հայաստանում չկա նման դեպքում բնությանը պատճառված վնասի հաշվարկման մեթոդ։
Նրա խոսքով՝ իրավական կարգավորումներով դաշտն այսօր հստակեցնելու հնարավորություն կա:
Իսկ քրեական գործով կպարզվեն բոլոր այն պատասխանատու անձինք, որոնք պետք է հետևեին, որպեսզի լիցենզիային համապատասխան լիներ ջրօգտագործումը, բայց դա չի իրականացվել:
