ԵՐԵՎԱՆ, 21 նոյեմբերի — Sputnik, Լաուրա Սարգսյան. Գեղեցկության մրցույթները հաճախ բազմաթիվ ասեկոսեներով և բամբասանքներով են ուղեկցվում։ Դրանցից մեկի համաձայն` աղջիկները սովամահ են լինում։ Իրականում ամեն ինչ այդպես չէ։ Sputnik Արմենիայի հետ զրույցում նման խոստովանություն արեց հայ մոդել Սոնա Դանիելյանը։
Հոկտեմբերի 6-ից նոյեմբերի 3-ը Սոնան մասնակցել է գեղեցկության հայտնի մրցույթներից մեկին` «Միսս Երկիր» մրցույթին, որը ՄԱԿ–ի հովանու ներքո անցկացվում էր Ֆիլիպիններում։ «Միսս Երկիր» մրցույթը նույնքան հայտնի է, որքան «Միսս Տիեզերքը», «Միսս Աշխարհը» և «Միսս Ինթերնեյշնլ»։ Տիտղոսի համար պայքարում էին գեղեցկուհիներ աշխարհի 90 երկրներից։
«Որքան էլ պարադոքսալ է, սակայն մրցույթի ժամանակ սահմանափակումներ չեն եղել, մեզ ուտելիքի մեծ չափաբաժիններ էին տալիս։ Մենք անդադար ուտում էինք, ուտելիքն այնքան համեղ էր, որ դժվարությամբ էինք կարողանում զսպել մեզ և հանձնվում էինք», – պատմեց Սոնան։
Հետագայում ստիպված էինք հաշվել գրամները և վառել ճարպերը մարզասարքերի վրա։ Սոնան մեր տարածաշրջանից միակն էր, ով մասնակցում էր մրցույթին։ «Միսս Երկիր» մրցույթի կազմակերպիչները նկատել էին նրան դեռ «Միսս Ասիա 2018» մրցույթի ժամանակ, որտեղ նա` վերջին 50 տարվա մեջ առաջին անգամ ներկայացնում էր Հայաստանը։ Այդ ժամանակ էլ նրան հրավիրեցին մասնակցելու «Միսս Երկիր» մրցույթին։ Այդ մրցույթին Սոնայից առաջ 2015 թվականին մասնակցել էր Լիլիթ Մարտիրոսյանը։ Սակայն աղջիկներին չի հաջողվել մրցանակային տեղեր զբաղեցնել ո՛չ այն ժամանակ, ո՛չ էլ հիմա։
«Ես պատրաստ չէի մասնակցելու այս մրցույթին, քանի որ առաջարկը ստացել եմ ամենավերջին պահին։ Համաձայնել եմ, միևնույն ժամանակ մեծ պատասխանատվություն զգալով, որ ներկայացնում եմ երկիրս նման հեղինակավոր միջոցառմանը», – ասաց Սոնան։
Նա խոստովանեց, որ ամեն ինչ շատ խիստ էր, և նրանց ժամանակացույցը հաշվարկված էր վայրկյան առ վայրկյան։ Նույնիսկ մրցույթի ազգային տնօրեն Յանա Գրիգորյանին, որը վերջին օրերին ժամանել էր աղջկան սատարելու համար, նա կարողացել է տեսնել ընդամենը 15 րոպե։
«Գրաֆիկը հագեցած և դաժան էր։ Սակայն ամենից շատ հիշվել է հոգեբանի հետ զրույցը։ Նման մրցույթներում դա աղջիկների համար սրտի հովացում է», – ասաց Սոնան։
Այս կարծիքը կիսում է նաև Յանա Գրիգորյանը։ Նրա խոսքով` անկախ նրանից, որ աղջիկների մեջ ագրեսիա կա, թե ոչ, նրանք փորձում են զսպել իրենց զգացումները, քանի որ ժյուրին գնահատում է ամեն ինչ` արտաքինից մինչև բնավորություն, և հոգեբանը նման միջոցառումների ժամանակ օդի պես անհրաժեշտ է։
«Մրցույթի եզրափակչի ժամանակ Վենեսուելայի ներկայացուցիչն ուշագնաց էր եղել։ Ամեն ինչ ազդում է`արագ սնվելը, գերհոգնածությունը, խիստ գրաֆիկը», – պատմեց Յանան։
Սոնան ծրագրել էր այս մրցույթի կազմակերպիչների հետ համագործակցել 2019 թվականին։ Սակայն նրա գեղեցկությունը գերել էր ֆիլիպինցիներին և նրանք հրավիրել էին աղջկան այս տարի։ Գրիգորյանն այս մրցույթը շատ կարևոր է համարում։
Հիշեցնենք, որ Յանա Գրիգորյանն ամեն կերպ փորձում է ներկայացնել Հայաստանի ներկայացուցիչներին գեղեցկության միջազգային տարբեր մրցույթներում։ Վերջերս Հայաստանն ըստ արժանվույն ներկայացվել է World Miss Tourism Ambassador, Face of Beauty International և այլ գեղեցկության մրցույթներին։
