ԵՐԵՎԱՆ, 21 նոյեմբերի — Sputnik. Մի քանի օրից հայկական ԱԷԿ–ի գեներատորներից մեկը նոր հզորությամբ կգործարկվի։ Այս մասին այսօր հրավիրված մամուլի ասուլիսին հայտարարեց ՀՀ էներգետիկ ենթակառուցվածքների և բնական պաշարների նախարարի պաշտոնակատար Գարեգին Բաղրամյանը։
Ռուսական վարկով կապիտալ վերանորոգման շրջանակում, 2018 թվականին ԱԷԿ–ը երկու ամիս (հունիսի 1-ից օգոստոսի 1-ը) կանգնած էր, և ևս 3.5 ամիս աշխատում էր և դեռ շարունակում է աշխատել կիսատ հզորությամբ (ապրիլի 15-ից հունիսի 1-ը և օգոստոսի 1-ից դեկտեմբերի 1-ը)։
2018 թվականի աշխատանքի արդյունքում կայանի հզորությունը կաճի 20 մգվտ–ով, իսկ 2019 թվականի վերջին` ևս 20-ով։ Արդյունքում կայանի հզորությունը 390-ից կդառնա մոտավորապես 430 մգվտ։ Վառելիքի նույն ծավալով կայանն ավելի շատ էլեկտրաէներգիա կարտադրի` տարեկան մի քանի հարյուր միլիոն կՎտ/ժ։
Դեռ վերանորոգումը չի ավարտվել, կայանն ամբողջ հզորությամբ չի աշխատում, այս տարի արտադրել է մոտ 1/3-ով պակաս էլեկտրաէներգիա, ինչը երկրի էներգահամակարգի համար ավելի քան 12 մլրդ դրամի լրացուցիչ ծանրաբեռնվածություն է ստեղծել։
«Սակայն վերանորոգումն ընթանում է ըստ պլանի և արդարացնում է իրեն», – ընդգծեց նախարարը։
Ավելացել է նաև Երևանի ՋԷԿ–ի արդյունավետությունը։ Կայանն իր միջոցներով կատարելագործել է գազատուրբինը, ինչը 1%–ով բարձրացրել է նրա ՕԳԳ–ն։ Այստեղ խնայողականությունը նույնպես աճել է։ Կայանը 14-15 մգվտ–ով ավելի հզոր կդառնա, իսկ գազ կսպառի նույնքան, որքան նախկինում։ Արդիականացման աշխատանքներն իրականացրել են ամերիկյան General Electric և ճապոնական Fuji Electric ընկերությունները։
Երկու կայաններն էլ` հայկական ԱԷԿ–ն ու Երևանի ՋԷԿ–ը, պետության կառավարման ներքո են։
ԱԷԿ–ի շահագործման ժամկետի երկարաձգման աշխատանքն իրականացվում է Ռուսաստանի կառավարության կողմից հատկացրած մինչև 270 մլն դոլարի վարկային գծի և 30 մլն դոլարի դրամաշնորհի հաշվին։ Նախատեսվում է աշխատանքն ավարտել մինչև 2019 կամ 2020 թվականի վերջ, իսկ կայանի ծառայության նախագծային ժամկետը կերկարացվի մինչև 2027 թվականը։
Հիշեցնենք, որ Հայաստանում 2017 թվականին 5 մլրդ 620 մլն կՎտ/ժ էլեկտրաէներգիա է սպառվել։ Դա 2016 թվականի համեմատ ավելի է մոտ 5,5%–ով։
