ԵՐԵՎԱՆ, 20 նոյեմբերի — Sputnik. Հայաստանի վարչապետի պաշտոնակատար Նիկոլ Փաշինյանն այսօր հրավիրված ասուլիսի ժամանակ խոսեց իր գործունեության հիմնական ձեռքբերումների և ձախողումների մասին։
Նա ասաց, որ տնտեսական ոլորտում ամենամեծ հաջողությունը համարում է մենաշնորհների վերացումը, ինչը Հայաստանի անկախացումից ի վեր համարվել է տնտեսական զարգացման առանցքային խոչընդոտը:
Երկրորդ հաջողությունը համարում է կոռուպցիայի դեմ պայքարը, որը կրկին տասնյակ տարիներով տնտեսության զարգացման կարևորագույն խոչընդոտներից է եղել: Հաջորդը ձեռքբերումն անվանեց ստվերի դեմ պայքարը. 37 հազար աշխատատեղ ստվերից դուրս է եկել և դրանք հրապարակային դաշտում գործող աշխատատեղեր են:
Փաշինյանը խոշորագույն ձախողում համարեց լեռնահանքային արդյունաբերության և, մասնավորապես, Ամուլսարի շուրջ ստեղծված իրավիճակը։
Ոսկու հանքի շահագործման աշխատանքները դադարեցվել են Հայաստանում իշխանափոխությունից հետո, հարուցվել է նաև քրեական գործ չարաշահումների և բնապահպանական օրենսդրության խախտումների փաստով։
Փաշինյանը խոստովանեց, որ ոլորտի խնդիրների լուծմանն ուղղված քայլերը ստեղծում են ներդրումային բացասական ֆոն, բայց համոզված է, որ ներդրումային միջավայրը շուտով կբարելավվի։
«Մի շարք խոշոր տնտեսվարողների հետ կապված քննություն է ընթանում, և, բնականաբար, մեր այդ գործողությունները որոշակի անհանգստություններ են առաջացնում: Բայց մենք ինտենսիվ աշխատում ենք մեր արտաքին գործընկերներին ներկայացնել մեր շարժառիթները, որպեսզի ներդրումային այդ զգացողությունը չլինի։ Հույս ունենք նաև, որ մինչև գարուն մեզ կհաջողվի որոշում ընդունել Ամուլսարի վերաբերյալ` հիմնված իրական փաստերի վրա», – ավելացրեց Փաշինյանը։
Նրա խոսքով՝ խնդիրներ կան «Հարավկովկասյան երկաթուղիներ» ընկերության գործունեության, Հյուսիս-հարավ և այլ նախագծերի հետ կապված: Այս բոլոր հարցերում ներգրավված են հեղինակավոր ծանրակշիռ կազմակերպություններ, նրանց կարծիքը կարևոր է ներդրումային գրավչության համար, բայց Հայաստանի շահերը նույնպես կարևոր են։
