ԵՐԵՎԱՆ, 20 նոյեմբերի — Sputnik. Հայկական երկրորդ հեռուստաալիքը պարզաբանում է ներկայացրել ՀՀ վարչապետի պաշտոնակատար Նիկոլ Փաշինյանի ասուլիսի ժամանակ հեռուստաընկերության սեփականատեր Սամվել Մայրապետյանի մասին հայտնած տեսակետի շուրջ։
Պարզաբանման մեջ նշվում է, որ հեռուստաընկերության անձնակազմն ու Սամվել Մայրապետյանի համար անձնական երաշխավորություն ներկայացրած մտավորականներն ու լրագրողները պահանջում են ոչ թե կարճել կամ չբացահայտել գործը, այլ ընդամենը փոխել խափանման միջոցը։
«Եվ սա այն դեպքում, երբ մեկ ու կես ամիս կալանքի տակ գտնվելու ընթացքում Սամվել Մայրապետյանի հետ որևէ քննչական գործողություն չի իրականացվել»,– ասված է պարզաբանման մեջ։
Ինչ վերաբերում է հաշիվների կալանքին: Վարչապետին ի սկզբանե ներկայացվել է ոչ թե հեռուստաընկերության հաշիվների կալանքի մասին տեղեկատվություն, այլ Սամվել Մայրապետյանի անձնական հաշիվների, որոնցից տարիներ շարունակ ուղիղ ֆինանսավորվում էր հեռուստաընկերությունը: Ավելին՝ վարչապետին այդ տեղեկատվությունը ներկայացնելիս տրամադրվել են նաև այդ ուղիղ փոխանցումները հավաստող բոլոր փաստաթղթերը»:
Հիշեցնենք` այսօր, լրագրողների հետ հանդիպմանը, վարչապետի պաշտոնակատար Նիկոլ Փաշինյանը, պատասխանելով Սամվել Մայրապետյանի նկատմամբ հարուցված քրեական գործի մասին հարցին, չէր բացառել, որ այդ գործում կարող է խոշոր կոռուպցիոն խաչմերուկ բացահայտվել։
Ինչ վերաբերում է Մայրապետյանի բանկային հաշիվներին, Փաշինյանն ասել էր. «Ինձ ասվել է, որ լրատվամիջոցի հաշվի վրա կալանք է դրված, հետաքրքրվեցի, պարզվեց՝ դրված չէ, դրված է միայն՝ որպես մեղադրյալ ներգրավված անձի հաշիվների վրա»։
Հայաստանի Հատուկ քննչական ծառայությունը հոկտեմբերին Մայրապետյանին մեղադրանք է առաջադրել` կաշառք ստանալու միջնորդության համար (ՀՀ ՔՕ 38-311 հոդված)։ Համարվում է, որ նա ՀՀ երկրորդ նախագահ Ռոբերտ Քոչարյանի մտերիմներից մեկն է։
Մայրապետյանը Հ2 հեռուստաընկերության և «Տոյոտա Երևան» ընկերության սեփականատերն է, ինչպես նաև Երևանի կենտրոնում զբաղվում է էլիտար անշարժ գույքի շինարարությամբ։
