ԵՐԵՎԱՆ, 19 նոյեմբերի — Sputnik. Երևանի Կենդանաբանական այգու տնօրեն Ռուբեն Խաչատրյանը պատրաստ է հրաժարական տալ, եթե գալիք լայնամասշտաբ ստուգումները խոշոր խախտումներ բացահայտեն։ Այդ մասին երկուշաբթի մամուլի ասուլիսում հայտարարեց Ռուբեն Խաչատրյանը։
Նախորդ շաբաթ Կենդանաբանական այգու մի քանի նախկին աշխատակիցներ և այժմ այգում աշխատող 5 անձ հավաքվել էին բողոքի ակցիայի` պահանջելով Խաչատրյանի հրաժարականը։
Նշենք, որ Կենդանաբանական այգում ամառային սեզոնին աշխատում է 87 մարդ, իսկ ձմեռային սեզոնին՝ 66:
Ավելի վաղ սկսվել էին տարածվել Այգում առյուծների էֆթանազիայի մասին լուրերը և կեղծ՝ ինտերնետում առկա մի տեսանյութից վերցված լուսանկարներ: Էֆթանազիան իրականում արվել էր 2017 թ.-ի մայիսին և, ըստ Այգու տնօրինության ներկայացրած փաստաթղթերի, եղել են վատառողջ տևական ժամանակ և ունեցել են կյանքի հետ անհամատեղելի հիվանդություններ։
Բողոքի ակցիայի մասնակիցները կարծում էին, որ տնօրենը չի սիրում կենդանիներին, իսկ Կենդանաբանական այգին նրա համար ընդամենը բիզնես է։
Ռուբեն Խաչատրյանը բոլոր այդ հայտարարությունները զրպարտություն է անվանում։ Ավելին, ինքն է առաջարկել քաղաքապետարանին ստուգումներ կազմակերպել կենդանաբանական այգում։
Խաչատրյանը կոչ է արել իրավապահ մարմիններին հետաքննություն սկսել ցանկացած ազդանշանով։ Նա նաև պատրաստվում է դիմել պատկան մարմիններին՝ հայց ներկայացնելով այն անձանց դեմ, որոնք, ըստ նրա, զրպարտում են իրեն։ Այգու տնօրենը, մասնավորապես, հերքեց Վայրի բնության և մշակութային արժեքների պահպանության հիմնադրամի միջոցով փող լվալու և անփութության մասին մեղադրանքները։
«Իրավապահ մարմինները զբաղվում են զեբրին թունավորելու միջադեպով։ Ցավոք, փորձաքննությունը հաստատել է մեր կասկածները և բացահայտել մկնդեղով թունավորումը։ Նման արարքն անթույլատրելի է, և բոլոր մեղավորները պետք է խստորեն պատժվեն», – ասաց նա` հավելելով, որ դիահերձման պատասխանները ցույց կտան` զեբրի մարմնի վրա եղել են կոտրվածքներ, թե ոչ, ինչպես պնդում են ակտիվիստները։
Կենդանաբանական այգու տնօրենը կարծում է նաև, որ անհրաժեշտ է մանրամասն ուսումնասիրել արջի մահվան հետ կապված միջադեպը։ Նրա համոզմամբ` անընդունելի է և անտրամաբանական, որ աշխատակիցը, տեսնելով, որ երկու արջ հարձակվել են երրորդի վրա, սառնասրտորեն կարող է նկարել՝ առանց օգնության կանչելու, որպեսզի կենդանուն փրկեն։
Վերջին շրջանում Երևանի կենդանաբանական այգու շուրջ կրքերը չեն հանդարտվում։ Վերջերս երկու էգ արջ անսպասելիորեն հարձակվել էին երրորդի վրա և հոշոտել նրան։ Ավելի ուշ տեղեկություն տարածվեց զեբրի թունավորման մասին։
Կենդանու բուժումն իրականացրել են տեղի անասնաբույժները, որոնք խորհրդակցել են Լեհաստանի, Հոլանդիայի, Էստոնիայի, Ռուսաստանի և Իրանի մասնագետների հետ։ Չնայած բոլոր ջանքերին` կենդանուն փրկել չի հաջողվել։
Իսկ արջերի պարագայում ի հայտ է եկել նոր հանգամանք. տեսանյութը, որը տարածվել էր, վաղ առավոտյան նկարահանել էր Այգու աշխատակիցներից մեկը՝ փոխանակ միջոցներ ձեռք առնելու, որ երկու մեծ արջերը չհասցնեին վնասել ավելի երիտասարդին:
