ԵՐԵՎԱՆ, 19 նոյեմբերի — Sputnik. Հաագայում բնակվող Թամրազյանների ընտանիքը արտաքսման վտանգի առաջ է կանգնել, հայտնում է Omroep West նիդեռլանդական հեռուստաալիքը։
Ընտանիքը 2010 թվականից Նիդեռլանդներում է ապրում, երեք դատական նիստերի ընթացքում նրանք փախստականի կարգավիճակ են ստացել, սակայն երկրի կառավարությունն ամեն դեպքում մտադիր է արտաքսել նրանց։
Հիմա իշխանություններից ընտանիքին բառացիորեն թաքցնում է բողոքական եկեղեցին։ Տեղի օրենքներով իրավապահ մարմինները եկեղեցի մտնելու իրավունք չունեն, քանի դեռ այնտեղ պատարագ է։ Այժմ քահանաները հերթով շուրջօրյա պատարագ են մատուցում, որպեսզի ընտանիքին եկեղեցուց չկարողանան տանել։ Դա նշանակում է, որ պատարագի համար հարյուրավոր հոգևորականներ են անհրաժեշտ։
Կրոնական գործիչներն այդպիսով փորձում են իշխանության ուշադրությունը հրավիրել հայ ընտանիքի ճակատագրի վրա։ Ժամերգությանը միացել են նաև կաթոլիկ քահանաները։
Միևնույն ժամանակ, ինչպես հայտարարեց պետքարտուղար Մարկ Հարբերսը, հայ ընտանիքը երկրում մնալ չի կարող։
«Թամրազյանների հայ ընտանիքի ապագան Նիդեռլանդներում չէ», – ասել էր նա անցած շաբաթ Pauw հեռուստահաղորդման եթերում։
Սակայն ընտանիքը հույս ունի, որ արդարադատության նախարար Մարկ Հերբերտը կօգտվի օրենքով իրենց տրված արտոնությունից և թույլ կտա մնալ, ինչպես դա եղավ հայ երեխաների` Լիլիի և Հովիկի դեպքում։
