ԵՐԵՎԱՆ, 19 նոյեմբերի — Sputnik. ՀՀԿ–ն կփորձի անցնել խորհրդարան «սևերի» և «սպիտակների» բաժանելու քաղաքականության շրջանակում, այսօր հրավիրված ասուլիսի ժամանակ ասաց քաղտեխնոլոգ Վիգեն Հակոբյանը։
Նրա խոսքով` նախընտրական ցուցակները կազմելու ընթացքում որոշ կուսակցություններ ելնում են պրագմատիզմի սկզբունքից։ Այդ պատճառով էլ ցուցակներում բավականին օդիոզ դեմքեր կան, որոնց լավ են ճանաչում, և իրենց հեղինակության հաշվին նրանք կարող են ձայներ բերել։
Հանրապետականների ցուցակի առաջին տասնյակում այն մարդիկ են, որոնք քաղաքական կշիռ ունեն, կարող են ԱԺ–ում կոնկրետ հարցեր բարձրացնել։ Օրինակ` Դավիթ Շահնազարյանը «միտված է» Արցախի հարցին։ Նման «թեմատիկ մարդիկ» են ընդգրկվել առաջին տասնյակում։ Միևնույն ժամանակ ցուցակում կան մարդիկ, որոնք ընտրության ժամանակ օգուտ չեն բերի կուսակցությանը, բայց նրանք պետք է այնտեղ լինեին` ելնելով աշխարհաքաղաքական խնդիրներից։
Քաղտեխնոլոգը համոզված է, որ «սևերի» և «սպիտակների» բաժանումը ձեռնտու կլինի հանրապետականներին, եթե նախընտրական արշավն այդ ճանապարհով ընթանա։ Միևնույն ժամանակ նրանց ձեռնտու է, որ դա անեն իշխանությունները։
Բանն այն է, որ Նիկոլ Փաշինյանը ոչ միայն համախոհներ ունի, այլև հակառակորդներ, թեկուզև նրանց թիվը քիչ է։ Քաղտեխնոլոգի կարծիքով` հանրապետականները կփորձեն իրենց կողմ ձգել ընդդիմադիր ընտրազանգվածին։ Ժամանակին Նիկոլ Փաշինյանն էր նույն տեխնոլոգիան օգտագործում` հայտարարելով, որ միակ ընդդիմադիրն ինքն է՝ այդպիսով փորձելով կոնսոլիդացնել ընդդիմադիր դաշտը, և դրա համար նրան քարկոծում էին: Հիմա նույնը Հանրապետականն է անում։
«Եթե հաջողվի, ապա ՀՀԿ–ն կկարողանա իր շուրջ համախմբել անհրաժեշտ ընտրազանգվածը», – ասաց Հակոբյանը։
Ինչ վերաբերում է «Իմ քայլը» դաշինքին, ապա նրանք այլ սկզբունքով են առաջնորդվել նախընտրական ցուցակը կազմելիս։ Ցանկում ընդգրկվել են բոլոր այն քաղաքացիական, հասարակական ուղղությունների ներկայացուցիչները, որոնք մասնակցել են հեղափոխությանը։
«Իշխանության համար դա լավ է, քանի որ հասարակական շարժման մի շարք ներկայացուցիչներ, որոնք չեն կարողանում իրենց դրսևորել կառավարության մեջ, ԱԺ կգնան։ Կարծում եմ, որ գործող կառավարության ներկայացուցիչների մի մասը ևս խորհրդարանում կհայտնվի», – ասաց Հակոբյանը։
Եթե ընտրություններում «Իմ քայլը» դաշինքի հաղթանակը կասկած չի առաջացնում, ապա ՀՀԿ–ն և ԲՀԿ–ն ԱԺ անցնելու համար պետք է պայքարեն։ Ինչ վերաբերում է «Մենք» և «Լուսավոր Հայաստան» դաշինքներին, ապա նրանք խանգարելու են միմյանց, քանի որ նրանց ընտրազանգվածը նման է։ Իսկ «Սասնա ծռերի» հարցում լուրջ դեր կխաղա նախընտրական արշավը։
ՀՅԴ–ի դեպքում խորհրդարան անցնելը խնդրահարույց է։ Եթե ընդունվեր նոր ԸՕ–ն, ապա կուսակցությունը հնարավորություն կունենար։ Նրանք փորձել են թարմացնել ցուցակը, ներառել անկուսակցական մարդկանց, ինչը նրանց համար անսովոր է։ Սակայն դա հազիվ թե բարելավի նրանց վիճակը։
«Ներկա պահին չեմ կարծում, որ այդ փոփոխություններն այնքան նշանակալի են, որ նոր իմիջ ստեղծվեր», – նշեց Հակոբյանը։
Հիշեցնենք, որ Ազգային ժողովի` դեկտեմբերի 9-ին կայանալիք արտահերթ ընտրություններին կմասնակցեն 11 քաղաքական ուժ` «Իմ քայլը» դաշինքը, «Բարգավաճ Հայաստան» կուսակցությունը, ՀՅԴ-ն, «Լուսավոր Հայաստան» կուսակցությունը, ՀՀԿ-ն, «Մենք» դաշինքը, «Ազգային առաջընթաց» կուսակցությունը, «Քրիստոնյա-ժողովրդական վերածնունդ» կուսակցությունը, «Սասնա ծռեր» կուսակցությունը, «Օրինաց երկիր» կուսակցությունը, «Քաղաքացու որոշում» սոցիալ-դեմոկրատական կուսակցությունը: Նախընտրական արշավը կմեկնարկի նոյեմբերի 26-ին։
