ԵՐԵՎԱՆ, 17 նոյեմբերի — Sputnik. Ամենայն Հայոց կաթողիկոս Գարեգին Բ-ն ու Ռուսաստանում Հայաստանի դեսպան Վարդան Տողանյանն այսօր Նովոսիբիրսկի մարզում մասնակցել են «Սուրբ Աստվածածին» եկեղեցու օծման հանդիսավոր արարողությանը։ Այս մասին հայտնում է ՌԻԱ Նովոստին։
Եկեղեցու օծման կապակցությամբ Հայ առաքելական եկեղեցու այցելուներին շնորհավորել է Նովոսիբիրսկի մարզի ղեկավար Անդրեյ Տրավնիկովը, Նովոսիբիրսկի ու Բերդսկի միտրոպոլիտ Տիխոնը, Նովոսիբիրսկի քաղաքապետ Անատոլի Լոկոտը։
«Շնորհակալ եմ Աստծուն, որ Ռուսաստանի Դաշնությունում ապրող մեր զավակները ջանքեր են թափում այստեղ հայկական եկեղեցիներ կառուցելու համար։ Այսօր Ռուսաստանի տարածքում արդեն մոտ 44 եկեղեցի կա», - լրագրողներին է ասել Գարեգին Բ-ն։
Նա նշել է, որ մարդիկ այդ եկեղեցիներում շնորհակալություն են հայտնում աստծուն, աղոթում են Ռուսաստանի և ռուս ժողովրդի, Հայաստանի և Ռուսաստանի բարեկամության ու եղբայրության համար։ Ամենայն Հայոց կաթողիկոսն այդ առումով բարձր է գնահատել Ռուսաստանի իշխանության աշխատանքը` ի դեմս մարզպետ Տրավնիկովի, և Ռուս ուղղափառ եկեղեցու կատարած աշխատանքը` ի դեմս մետրոպոլիտ Տիխոնի։
Միաժամանակ մարզպետ Տրավնիկովն ասել է, որ Նովոսիբիրսկը բազմազգ ու համերաշխ մարզ է, իշխանությունն էլ բոլոր պայմանները ստեղծում է այդ ազգերի միավորման, նրանց ինքնության պահպանման համար։
Նովոսիբիրսկի մարզի ղեկավարը նաև այսօր աշխատանքային հանդիպում է անցկացրել հայկական պատվիրակության հետ։ Կողմերը միջազգային, միջեկեղեցական և ազգամիջյան համագործակցության արդիական հարցեր են քննարկել։
