ԵՐԵՎԱՆ, 14 նոյեմբերի — Sputnik. Թեղուտի պղնձամոլիբդենային հանքավայրը կարող է նոր կառավարիչ ունենալ։ Այս մասին ԱԺ–ում հարց ու պատասխանի ժամանակ ասաց փոխվարչապետի պաշտոնակատար Տիգրան Ավինյանը։
Հանքավայրը դադարեցրել է աշխատանքը մարտի սկզբին, և այժմ կառավարությունը` ֆինանսավորման հնարավոր նոր սխեմաների վերաբերյալ բանակցում է ՎՏԲ բանկի (այդ թվում Մոսկվայում գտնվող նրա գլխամասի) հետ։
«Չի բացառվում, որ նոր ընկերություն հայտնվի, որը կցանկանա ստանձնել հանքավայրի կառավարման պատասխանատվությունը։ Նման հարց է քննարկվում։ Կարծում եմ` նոր օպերատոր կգտնվի», – ավելացրեց նա։
Ինչ վերաբերում է Ալավերդու պղնձաձուլարանին, որն իր աշխատանքը դադարեցրեց մեկ ամիս առաջ, ապա բանակցություններ են տարվում արտասահմանյան ներդրողների հետ։ «Ավելի բարձր հզորություն արտադրելու մասին ենք մտածում, որը կկարողանա տարեկան 100 հազար տոննա հանքաքար վերամշակել»,–նշեց նա։
Հիշեցնենք, որ Ալավերդու պղնձաձուլարանն ու Թեղուտի հանքավայրը շահագործում է «Վալլեքս» ընկերությունը։ Ընկերությունը ֆինանսական դժվարությունների առաջ է կանգնել, որի պատճառով պարտք է կուտակել իր վարկատու ՎՏԲ բանկի նկատմամբ։
