ԵՐԵՎԱՆ, 14 նոյեմբերի — Sputnik. Նախարարությունների թիվն առաջիկայում կդառնա 9-11–ը` ներկայիս 17-ի փոխարեն։ Այսօր` նոյեմբերի 14-ին, Ազգային ժողովում այս մասին լրագրողներին ասաց ՀՀ առաջին փոխվարչապետի պաշտոնակատար Արարատ Միրզոյանը` անդրադառնալով պետական համակարգում սպասվող կրճատումներին ու օպտիմալացմանը` նշելով, որ այժմ պետական կառավարման համակարգը շատ է ուռճացված
«Մենք մի քանի տարբերակներ ունենք մեր աշխատասեղանին, և այդ տարբերակներն 90 տոկոսով համընկնում են, տարբերությունները շատ չնչին են, մեկ–երկու նախարարութան տարբերություն կա»,– ասաց Միրզոյանը։
Նա շեշտեց, որ պետական կառավարման համակարգին զուգահեռ գործում են հիմնադրամներ, ՊՈԱԿ–ներ, որտեղ ավելի մեծ ֆինանսական հոսքեր ու ռեսուրսներ կան, և որոնք կրկնում են այն գործառույթները, որ պետք է նախարարություններն անեն։
«Այսինքն` պետք է այս ամենը վերանայել, բոլորի գոյությունը հատ–հատ վերաիմաստավորել»,– ասաց Միրզոյանը։
Նա նշեց, որ օպտիմալացման արդյունքում հնարավոր կլինի բարձրացնել քաղծառայողների աշխատավարձերը։
ԶԼՄ–ների հրապարակումների համաձայն` կմիավորվեն սոցիալական հարցերի և առողջապահության նախարարությունները, սպորտի, երիտասարդության և մշակույթի նախարարությունները, սփյուռքի նախարարությունն ու ԱԳՆ-ն։
