ԵՐԵՎԱՆ, 14 նոյեմբերի — Sputnik. Հայաստանի Կոմունիստական Կուսակցությունը բոյկոտում է ՀՀ ԱԺ արտահերթ ընտրությունները: Կոմկուսի տարածած հայտարարության մեջ ասված է, որ արտահերթ ընտրությունների հապճեպության, կուսակցությունների համար մեկնարկային անհավասար պայմանների` հին ընտրական օրենսգրքով, բարձր ընտրագրավի և երկրում ստեղծված քաղաքական անառողջ մթնոլորտի պատճառով Հայաստանի Կոմունիստական Կուսակցությունը բոյկոտում է ՀՀ ԱԺ արտահերթ ընտրությունները:
Նմանատիպ հայտարարությամբ է հանդես եկել նաև «Երկիր Ծիրանի» կուսակցությունը, որն արտահերթ խորհրդարանական ընտրություններն անվանում է «կեղծ նախաձեռնություն»:
«27-ամյա ավտորիտար համակարգում տեղի ունեցած վերադասավորումները և անվանափոխությունները չեն կարող երաշխավորել արդար, հավասար և թափանցիկ պայմաններում ընտրական իրավունքի իրացում: Ավտորիտար ռեժիմի կեղծ տապալման` նմանակման (իմիտացիայի) պայմաններում, այսպես կոչված՝ «խորհրդարանական ընտրություններ» անվանվող քաղաքական պայքարն ի սկզբանե ձախողված է»,– ասված է հայտարարության մեջ։
ԱԺ արտահերթ ընտրությունները նախանշված են 2018 թ.–ի դեկտեմբերի 9-ին։ ԿԸՀ մասնակցության հայտ ներկայացնելու ժամկետը լրանում է այսօր` նոյեմբերի 14-ին, ժամը 18։ 00-ին։
