ԵՐԵՎԱՆ, 13 նոյեմբերի — Sputnik. Երևանի կենդանաբանական այգու զեբրն այսօր` նոյեմբերի 13-ին, սատկել է։ Այս մասին Sputnik Արմենիային հայտնեցին կենդանաբանական այգու տնօրինությունից։
Հետաքրքրական է, որ լաբորատոր հետազոտության տվյալներով, կենդանու արյան և մեզի մեջ հայտնաբերվել է մեծ քանակությամբ մկնդեղի (արսեն) պարունակություն։
Ու թեև զեբրի բուժումն իրականացրել են մի խումբ տեղացի կենդանաբույժներ` Լեհաստանի, Հոլանդիայի, Էստոնիայից, Մոսկվայի, Իրանի ու Վրաստանի իրենց կոլեգաների խորհրդատվությամբ, կենդանու կյանքը փրկել չի հաջողվել։
Կենդանուն թունավորելու դիտավորության կասկածով և հանգամանքները պարզելու համար դեռ նոյեմբերի 10-ին հաղորդում էր տրվել ՀՀ ոստիկանության Նոր Նորքի բաժին։
Այժմ ոստիկանությունում նյութեր են նախապատրաստվում դեպքի հանգամանքները պարզելու առնչությամբ։
Հիշեցնենք, նոյեմբերի 6-ին զեբրին խնամողը գտել էր կենդանուն ոչ բնական դիրքով պառկած։ Տևական անշարժունակությունից դատելով նախապես կասկածներ էին առաջացել, որ կենդանու հետին վերջույթներից մեկը կոտրված է։
