ԵՐԵՎԱՆ, 13 նոյեմբերի – Sputnik, Արմենուհի Մխոյան. Գյումրու գիշերօթիկ հաստատության բակում հայտնաբերված Վահանն ու Վահեն այս պահին դեռ Գյումրիում են: Sputnik Արմենիային այս մասին հայտնեց Շիրակի մարզպետարանի աշխատակազմի ընտանիքի, կանանց և երեխաների իրավունքների պաշտպանության բաժնի պետ Լիլիթ Գորգինյանը:
«Փոքրիկները լավ են, մեծանում են, հսկողության տակ են»,- ասաց նա։
Գորգինյանը մի կարևոր հանգամանք նշեց։
«Փոքրիկների մայրն այցելում է երեխաներին, ինչն անչափ կարևոր է, բայց այս պահին չեմ կարող ասել, թե դեռ որքան ժամանակ տղաները կմնան Գյումրիում»,– ասաց նա:
Հիշեցնենք` հոկտեմբերի 17-ին, ժամը 20.00-ին, Գյումրու Շիրակացի թիվ 10 հասցեում գտնվող Ֆ.Նանսենի անվան գիշերօթիկ հաստատությունից ոստիկանությանը հայտնել էին, որ հաստատության բակում երկու նորածին են հայտնաբերել։
Ավելի ուշ հայտնի պարզվել էր, որ երկվորյակների մայրը 18 տարեկան Մ․ Մ․-ն է։ Նա ասել էր, որ սոցիալական ծանր պայմանների պատճառով հրաժարվում է երեխաներից ։
Հոկտեմբերի 24-ին նրա հետ էր հանդիպել ՀՀ աշխատանքի և սոցիալական հարցերի նախարարի պաշտոնակատար Մանե Թանդիլյանը, և երկվորյակների մայրն ասել էր, որ գիտակցել է իր սխալը և ուզում է վերադարձնել իր փոքրիկներին։
Թանդիլյանը Sputnik Արմենիայի հետ զրույցում վստահեցրել էր` ամեն բան անելու է, որ երեխաները մեծանան ծնողի հետ:
