ԵՐԵՎԱՆ, 12 նոյեմբերի – Sputnik. 25-ամյա թուրք գեղեցկուհի, 2016թ․ «Միսս Եվրասիա» գեղեցկության մրցույթի հաղթող Սիբեր Դեմիրալփը դատապարտվել է 13 տարվա ազատազրկման։ Նա մեղադրվում է գործարարից շանտաժի միջոցով գումար շորթելու մեջ: Այս մասին հայտնում է ermenihaber.am-ը։
2017թ գեղեցկուհին, համացանցի միջոցով ծանոթանալով թուրք գործարար Հ. Ֆ.-ի հետ, նրան հրավիրել է նախաճաշի: Սակայն հանդիպման վայր հանդիսացող տանը Դեմիրալփը մենակ չի եղել: Նրա հետ եղել են ևս 5 տղամարդ, և, երբ գործարարը եկել է, տղամարդիկ ծեծել են նրան:
Հանցավոր խումբը մերկացրել և լուսանկարել է գործարարին, ապա լուսանկարները չհրապարակելու դիմաց նրանից 240 հզ թուրքական լիրա պահանջել։ Գործարարը բավարարելով հանցագործների պահանջը՝ նրանց հաշվին է փոխանցել պահանջվող գումարը:
Ոստիկանությունը պարզել է, որ Դեմիրալփը նախապես ամեն ինչ ծրագրել և միտումնավոր է թակարդը գցել գործարարին։ Թուրք գեղեցկուհին բերման է ենթարկվել դեռևս 2017թ․ հուլիսին, իսկ նրա դատավճիռը կայացրել են օրեր առաջ։
Նրա հետ միասին ազատազրկման են դատապարտվել այն անձինք, ովքեր ծեծել են թուրք գործարարին։
Դատական նիստերից մեկի ժամանակ գեղեցկուհին արտասվել է՝ ասելով, որ զղջում է իր արարքի համար:
