ԵՐԵՎԱՆ, 12 նոյեմբերի — Sputnik. 2019թ–ի բյուջեով գիտական ոլորտի ֆինանսավորումը չի ավելացել, պետական ֆինանսավորումը սննդամթերքի անվտանգության ոլորտում լուրջ ուսումնասիրությունների հնարավորություն չի ապահովում։ Այս մասին այսօր լրագրողների հետ հանդիպմանն ասաց ԳԱԱ Էկոկենտրոնի սննդի ռիսկերի գնահատման կենտրոնի ղեկավար, սննդագիտության դոկտոր Դավիթ Պիպոյանը։
«Կոսմետիկ լուծումներով հնարավոր չէ անվտանգություն ապահովել միս–մսամթերքի, կաթ–կաթնամթերքի, հացի ոլորտներում։ Դրա համար անհրաժեշտ են նորագույն մոտեցումներ։ Դրանցից մեկը, օրինակ, հետագծելիության համակարգի ներդրումն է։ Եթե դու ունես հետագծելիության համակարգ, ակնհայտ է դառնում, որ եթե տարեկանի ալյուր երկիր չի ներմուծվել, չի կարող տարեկանի հաց արտադրվել։ Եվ շատ արագ կարելի է բացահայտել կեղծիքը»,– ասաց Պիպոյանը` հավելելով, որ ծրագիր կա, բայց այն իրականացնելու համար գումարներ չկան։
Այդուհանդերձ, կենտրոնը նախատեսում է պիլոտային ուսումնասիրության որոշ ծրագրեր իրականացնել, մասնավորապես`հրուշակեղենի, ալյուրի, հացի, կաթնամթերքի, մսամթերքի, պտուղ– բանջարեղենի, ջրի ու շոկոլադի ապրանքախմբերում։
Ուսումնասիրությունը կտևի 2 տարի, բայց Պիպոյանը խոստանում է ավելի վաղ հայտնել սպառողներին, թե ինչ են իրականում ուտում նրանք։
Պիպոյանի խոսքով` ուսումնասիրության յուրաքանչյուր փուլից հետո հանրությանը կտեղեկացնեն, թե տվյալ սննդամթերքում ինչ վտանգավոր նյութեր ու ինչ ռիսկեր են հայտնաբերվել։
