ԵՐԵՎԱՆ, 12 նոյեմբերի — Sputnik. Աստանայում ՀԱՊԿ գագաթնաժողովի քննարկման հիմնական հարցը գլխավոր քարտուղարի նշանակումը չի եղել։ Բելտան հայտնում է, որ Բելառուսի նախագահ Ալեքսանդր Լուկաշենկոն այս մասին ասել է Մինսկում Ադրբեջանի դեսպան Լատիֆ Գանդիլովի հետ հանդիպման ժամանակ։
Հայաստանի ներկայացուցիչ Յուրի Խաչատուրովը պաշտոնը լքեց նոյեմբերի 2-ին։ Նրա նկատմամբ քրեական գործ է հարուցվել 2008 թվականի մարտի 1-ի ողբերգական դեպքերի հետաքննության շրջանակում։
Բելառուսի առաջնորդն ասել է, որ իրեն զարմացնում են գագաթնաժողովի օրակարգի հետ կապված հրապարակումները։
«Ես տեսնում եմ, որ ամեն ինչ տարվում է մի ուղղությամբ, թե մենք իբր քննարկել ենք միայն ՀԱՊԿ ապագա ղեկավարի թեկնածությունը։ Այո, մենք քննարկել ենք այդ հարցը, բայց երևի 15 րոպե է խլել մեզնից», – ասել է նա։
Լուկաշենկոն նաև նշել է, որ ՀԱՊԿ գլխավոր քարտուղարի պաշտոնի համար բազմաթիվ թեկնածուներ կան։
«Բնականաբար, շատ տարբերակներ կան։ Եվ դա չի նշանակում, թե մենք նեղացրել են Հայաստանին, որ որևէ մեկը հաղթել է, որևէ մեկը` պարտվել։ Հարցն այն է, որ Նիկոլ Փաշինյանը պարզապես պետք է կարգավորի իրավիճակը կառավարությունում, քանի որ այդ երկիրն այսօր գլխավորում է ԵԱՏՄ–ն, մեր տնտեսական միությունը, և ՀԱՊԿ–ը շատ մեծ բեռ է մի երկրի համար, որը նման անցումային շրջան է ապրում։ Արդյո՞ք Հայաստանը կկարողանա գլուխ հանել», – ասել է Բելառուսի նախագահը։
Նա ավելացրել է, որ եթե Փաշինյանը գլուխ հանի իրավիճակից, ապա որոշումը կկայացվի ՀԱՊԿ պետությունների ղեկավարների հանդիպմանը, որը նախատեսված է դեկտեմբերի 6-ին։
Աստանայում անցկացրած գագաթնաժողովի արդյունքում Ղազախստանի նախագահ Նուրսուլթան Նազարբաևը լրագրողներին հայտնել է, որ Հայաստանն ուզում է պահպանել գլխավոր քարտուղարի պաշտոնը։ Սակայն ժամկետի ավարտին մեկ տարի է մնում, և Նազարբաևը կարծում է, որ մեկ տարվա ընթացքում նոր գլխավոր քարտուղարը (եթե այն Հայաստանից լինի) չի հասցնի նույնիսկ բոլոր երկրներ այցելել։
Հիշեցնենք` հուլիսի 28-ին Երևանի ընդհանուր իրավասության դատարանի դատավոր Դավիթ Բալայանը Յուրի Խաչատուրովի նկատմամբ կալանավորումը որպես խափանման միջոց ընտրելու միջնորդության քննության արդյունքում նախ որոշել էր բավարարել միջնորդությունը, ապա մեղադրյալի նկատմամբ այլընտրանքային խափանման միջոց` գրավ կիրառելու որոշում կայացրել:
Որպես այլընտրանքային խափանման միջոց գրավը ճանաչել էր թույլատրելի: Գրավի չափ էր սահմանվել 5 մլն դրամը, ինչը վճարելուց հետո Խաչատուրովն ազատվել էր արգելանքից:
Խաչատուրովին մեղադրանք է առաջադրվել 2008 թվականի մարտի 1-ից 2-ն ընկած ժամանակահատվածում Երևան քաղաքում տեղի ունեցած իրադարձությունների վերաբերյալ ՀՀ հատուկ քննչական ծառայությունում քննվող քրեական գործով, այն բանի համար, որ նա այլ անձանց հետ նախնական համաձայնությամբ տապալել է ՀՀ սահմանադրական կարգը:
