ԵՐԵՎԱՆ, 12 նոյեմբերի — Sputnik. Խուժան կռվի արդյունքում մենք կունենանք խուժան խորհրդարան` դրանից բխող հետևանքներով։ Այսօր ԱԺ-ում լրագրողների հետ զրույցում, մեկնաբանելով առաջիկա ընտրություններին ՀՀԿ–ի նախընտրելի մարտավարությունը, ասաց ՀՀԿ փոխնախագահ Արմեն Աշոտյանը։
«Եթե այս ընտրությունների վրա ստվեր նետող լինի, այդ ստվերը նետելու է բացառապես կառավարությունը և այդ կառավարությունում իր որոշիչ ձայնն ունեցող վարչապետը։ Եթե վարչապետն իրոք ուզում է լավ ընտրություններ, ապա պետք է օր առաջ ուղերձներ տա բոլորին, որ այս ընտրությունները պետք է նմանվեն բռնցքամարտի: Մենք բռնցքամարտից չենք վախենում, բայց բռնցքամարտում մեկը մեկի հետ է պայքարում, ոչ թե հազարը մեկի»,– ասաց նա։
Եթե հազարը մեկի դեմ է պայքարում, ապա, ըստ Աշոտյանի, «դա արդեն բռնցքամարտ չէ, այլ խուժան կռիվ։ Խուժան կռվի դեպքում մենք կունենանք խուժան խորհրդարան` այստեղից բխող բացասական հետևանքներով»,– ասաց նա` հավելելով, որ ՀՀԿ–ն պատրաստ է մեկը մեկի դեմ քաղաքական բանավեճի։
Աշոտյանը կարծում է, որ «Իմ քայլը» դաշինքը պետք է ամեն ինչ անի, որ լինի հավասար հնարավորությունների ընտրարշավ, և դա առավելապես պետք է ոչ թե ընդդիմությանը, այլ հենց իշխանությանը։
«Մենք իշխանություն չենք, պըրծ, քըխ, Հանրապետականը գնացել է։ Եկել է իշխանություն, որն ասում է` ես ավելի լավն եմ, ես ունեմ մազեր, կապուտաչյա եմ, ավելի ուժեղ եմ։ Իշխանության կարիքն ընդդիմության մեջ է լինելու, որովհետև երբ, օրինակ, ղարաբաղյան հարցով, Աստված մի արասցե, տոտալ իշխանություն ունեցող մարդուն դեմ տան լուծում, ինքն այլևս չի կարողանալու ասել` գիտեք, ես ժողովրդի հետ խնդիր եմ ունենալու»,– ասաց նա։
Ինչ վերաբերում է ընդդիմությանը, ապա Աշոտյանը վստահ է` իրական ընդդիմությունը ՀՀԿ–ն է, իսկ «Լուսավոր Հայաստան» կուսակցությանը գովաբանում են Նիկոլ Փաշինյանի աջակիցները։
