ԵՐԵՎԱՆ, 12 նոյեմբերի — Sputnik, Դավիթ Գալստյան. Ղարաբաղյան հակամարտության բանակցությունների թեման երկրորդ պլան է մղվել Հայաստանում տիրող ներքաղաքական իրավիճակի ֆոնին։ Փաշինյանի և Ալիևի` Դուշանբեում կայացած հանդիպումից հետո շփման գծում տիրող իրավիճակը համեմատաբար հանդարտվել է։
Sputnik Արմենիան զրուցել է փորձագետների հետ` պարզելու համար, թե արցախյան թեմայով բանակցություններում ինչ փոփոխություն կարող է լինել Հայաստանում նախատեսված խորհրդարանական ընտրությունից հետո։
Քաղտեխնոլոգ Վիգեն Հակոբյանը կարծում է, որ դժվար թե ինչ–որ արտառոց բան լինի և նոր հայեցակարգեր ի հայտ գան։
«Հայեցակարգը նույնն է և տեղավորվում է Մադրիդյան սկզբունքների շրջանակում, որոնց մասին վերջին շրջանում շատ է խոսում ԱՄՆ նախագահի ազգային անվտանգության հարցերով օգնականը (խոսքը Ջոն Բոլտոնի մասին է` խմբ.)», – ասաց Հակոբյանը։
Նրա խոսքով` անցած տասնամյակներում բոլոր հնարավոր տարբերակները մանրակրկիտ ուսումնասիրվել են։ Առայժմ բոլորը սպասում են Հայաստանում կայանալիք ընտրությունների ավարտին։ Դրանից հետո, ամենայն հավանականությամբ, կլինի բանակցությունների գործընթացի կտրուկ ակտիվացում։
Նրա կարծիքով` որոշ աշխարհաքաղաքական կենտրոններ (թեկուզ բանավոր) ինչ–որ երաշխիքներ են տվել Ադրբեջանին, որ հայկական կողմն ընտրություններից հետո կնստի բանակցությունների սեղանի շուրջ։
«Գուցե ադրբեջանական կողմն ավելորդ լավատեսություն ունի այս հարցում։ Ամեն դեպքում հիմա որոշակի լռություն է տիրում բանակցությունները վերսկսելու նոր փորձերից առաջ։ Այդ մասին են խոսում աշխարհաքաղաքական բոլոր կենտրոնների ներկայացուցիչները, այդ մասին է ասել նաև Բոլտոնը, մոտավորապես նույնը նկատի է ունեցել նաև Լավրովը», – ասաց Հակոբյանը։
Այն միտքը, որ բանակցություններն անիմաստ են առանց Ստեփանակերտի (ինչի մասին ժամանակին իր առաջին ելույթում ասել է վարչապետ Նիկոլ Փաշինյանը), քաղաքագետի կարծիքով, կմնա Հայաստանի ղեկավարի «զինանոցում»։
Ինչպես կարծում է փորձագետը, թեև բանակցությունների ձևաչափը փոխելու հայկական կողմի փորձերը շարունակվում են, այդուհանդերձ դրանք առաջին հերթին ուղղված են բանակցային ռեսուրսի ընդլայնմանը։
«Հայկական դիվանագիտությունն ամեն դեպքում փորձում է դա օգտագործել բանակցություններում ճկունության աստիճանը մեծացնելու համար», – նշեց Հակոբյանը։
Ռուս քաղաքագետ Արթուր Աթաևը կարծում է, որ առայժմ ղարաբաղյան հակամարտության լուծման բանաձև չկա։ Հարավային Կովկաս կատարած այցի ժամանակ ԱՄՆ նախագահի խորհրդական Ջոն Բոլտոնը փորձել է մշակել այն` հակամարտության լուծումը «կապելով» Փաշինյանի անձի հետ։
Ավելի վաղ Բոլտոնը հայտարարել էր, որ եթե Նիկոլ Փաշինյանը հաղթի ընտրություններում, ապա ղարաբաղյան հակամարտության կարգավորման հարցում վճռական քայլերի գնալու լավ հնարավորություն կունենա։ Դրան ի պատասխան` Փաշինյանը հայտարարել էր, որ ո՛չ Բոլտոնը, ո՛չ մեկ ուրիշը չեն կարող խոսել իր անունից, իսկ հակամարտության լուծումը պետք է ընդունելի լինի Հայաստանի ու Արցախի ժողովուրդների համար։
«Տեղի է ունենում բանաձևի պարտադրում` այդ հակամարտության լուծումը կապելով մեկ անձի հետ։ Փաշինյանը նրան պատասխանել է, որ որոշումը կայացնում է ժողովուրդը։ Այսպիսով, նա իրեն զերծ է պահել պատասխանատվությունից, համենայն դեպս, դրա քաղաքական բաղադրիչից։ Փաշինյանը փորձ է հավաքել` որպես քաղաքական գործիչ, նրա հայտարարությունները կշռադատված են», – ասաց Աթաևը։
