ԵՐԵՎԱՆ, 9 նոյեմբերի – Sputnik. Հայաստանի ծանրամարտի տղամարդկանց թիմի անդամ, Օլիմպիական խաղերի արծաթե մեդալակիր Սիմոն Մարտիրոսյանը Թուրքմենստանում ընթացող աշխարհի առաջնությունում 109 կգ քաշային կարգում, ֆանտաստիկ ելույթով ու երկամարտի 435 կգ արդյունքով դարձավ աշխարհի չեմպիոն` միաժամանակ հրում վարժությունում ու երկամարտում սահմանելով աշխարհի նոր ռեկորդ:
Աշխարհի չեմպիոնի կոչումը հայ ծանրորդներից վերջին անգամ 2010 թվականին նվաճել էր Տիգրան Մարտիրոսյանը: Ութ տարվա ընդմիջումից հետո մենք ունեցանք աշխարհի նոր չեմպիոն ծանրամարտում:
Աշխաբադ մեկնելուց առաջ Սիմոն Մարտիրոսյանը Լեհաստանի Զամոսկ քաղաքում նվաճեց մինչև 23 տարեկան ծանրորդների Եվրոպայի չեմպիոնի կոչումը երկամարտի 420 կգ (190+230) արդյունքով: Հայ երիտասարդ ծանրորդը «մեծերի» մրցումներում առաջին անգամ չէ, որ մրցահարթակ է դուրս գալիս ու հասնում մեծ նվաճումների: Օլիմպիական խաղերի արծաթե մեդալակիրն այս մրցումներում էլ հաղթողի հիմնական հավակնորդներից մեկն էր:
Տակտիկական շատ ուժեղ ու լարված պայքարում մեդալի հիմնական հավակնորդներն անընդհատ փոխում էին իրենց նախնական պատվիրված քաշերը: Մեդալի հավակնորդներից նեկը՝ չինացի մարզիկ Յանգ Ժին, առաջինը դուրս եկավ մրցահարթակ ու գլխավերևում պահեց 186 կիլոգրամանոց ծանրաձողը: Իսկ հետո հերթը հասավ Ռիոյի օլիմպիական չեմպիոն Ռուսլան Նուրուդինովին, որն առաջին մոտեցման ժամանակ տեխնիկական սխալ թույլ տվեց, ու 187 կգ քաշը մրցավարները չհաշվեցին: Ու այդ մոտեցումից հետո օլիմպիական չեմպիոնը ձախողեց հաջորդ երկու մոտեցումներն ու, զրո ստանալով, դուրս մնաց հետագա պայքարից:
Պոկում վարժությունում Սիմոնն իր ելույթները սկսեց 190 կգ կշռող ծանրաձողին մոտենալով ու շատ վստահ և հանգիստ կատարեց իր գործը: Պոկում վարժությունում պայքարը ոսկե մեդալի համար ծավալվեց Մարտիրոսյանի ու Յանգ Ժիի միջև: Սիմոն Մարտիրոսյանը պահեց գլխավերևում աշխարհի ռեկորդ համարվող 197 կգ–ը, բայց մրցավարները տեխնիկական սխալ տեսան ու չհաշվեցին քաշը: Սիմոնը 195 կգ արդյունքով պոկում վարժությունում ճանաչվեց երկրորդը, իսկ չեմպիոնի կոչումն այս վարժությունում 196 կգ արդյունքով շնորհվեց չինացի Յանգ Ժիին:
Պարզ դարձավ, որ հենց այս երկու ծանրորդներն էլ վիճարկելու են աշխարհի չեմպիոնի կոչումը երկամարտում: Յանգ Ժին ամեն ինչ արեց Մարտիրոսյանին տակտիկական պայքարի մեջ ներքաշելու համար, բայց ապարդյուն: Սիմոնն առաջին մոտեցման համար պատվիրել էր 230 կգ, իսկ չինացին երեք մոտեցումներից հետո ցույց տվեց 223 կգ արդյունք, ու մեր մարզիկին առաջին իսկ մոտեցման ժամանակ ապահովեց աշխարհի չեմպիոնի կոչումը:
Սիմոնը փայլեց իր վարպետությամբ: 21–ամյա երիտասարդը ուղղակի հիացմունք պատճառեց իր սլացիկ, գեղեցիկ ու վստահ գործողություններով, հայ ծանրամարտիկը ոչ մի շանս չտվեց ոչ ոքի, ու դարձավ մոլորակի լավագույն ծանրորդը 109 կգ քաշային կարգում:
