ԵՐԵՎԱՆ, 9 նոյեմբերի — Sputnik. Ես առանձնահատուկ հայտարարություն չեմ արել հայ-թուրքական հարաբերությունների մասին։ Այսօր լրագրողներին ասել է ՀՀ նախագահ Արմեն Սարգսյանը` անդրադառնալով հայ-թուրքական հարաբերություններին ու Թուրքիայի նախագահ Ռեջեփ Թայիփ Էրդողանի հետ հավանական հանդիպման մասին ասածին:
Նա ասել է, որ նման հայտարարություններ պետք է անեն ՀՀ արտաքին գործերի նախարարությունը և կառավարությունը:
«Ուղղակի իմ հարցազրույցներից մեկի ժամանակ հարց տվեցին` եթե այս պահին Ձեր դիմաց կանգնած լիներ Էրդողանը, ի՞նչ կասեիք, և որպես հայ ասացի, որ մենք խոսելու բան ունենք», – ասաց Սարգսյանը։
Ըստ նրա` դա քաղաքական հայտարարություն չէր, այլ հայ մարդու վերաբերմունք, որն այս պահին նախագահի պաշտոն է զբաղեցնում։
Հիշեցնենք, որ RTS շվեյցարական հեռուստառադիոընկերությանը տված հարցազրույցում Սարգսյանը չէր բացառել, որ Հայաստանը մի օր կների Թուրքիային, բայց միաժամանակ նշել էր` ներումը գալիս է ճանաչումից հետո։
