ԵՐԵՎԱՆ, 7 նոյեմբերի – Sputnik. «Քաղաքացիական պայմանագիր» կուսակցությունն ԱԺ արտահերթ ընտրություններում 15 ռեյտինգային թեկնածու կունենա Շիրակի մարզում։ այսօր Ազգային ժողովում լրագրողների հետ զրույցում այս մասին ասաց Շիրակի մարզպետ Կարեն Սարուխանյանը:
Մարզպետը նշեց, որ մարզում թեժ ընտրապայքար է կանխատեսում։
«ՔՊ-ն մեծ շանսեր ունի Շիրակում, սոցիալական խնդիրները հիասթափության պատճառ չեն, քանի որ մարդիկ հասկանում են` 30 տարում կուտակված խնդիրները հնարավոր չէ մի քանի ամսում լուծել»,-ասաց նա։
Սարուխանյանը հստակ գնահատական չտվեց մարզում առաջադրված ռեյտինգային թեկնածու, արտակարգ իրավիճակների նախարարի պաշտոնակատար Ֆելիքս Ցոլակյանի օգտին վարչական ռեսուրսի ու հին կապերի օգտագործման մասին լուրերին:
«Ընտրությունները կսկսվեն, կտեսնենք»,- ասաց նա:
Ինչ վերաբերում է սոցիալական վիճակին, մարզպետը նշեց, որ Գյումրիում լայնածավալ շինարարական աշխատանքների մեկնարկով մեծապես կրճատվել է գործազրկությունը, բայց խնդիրներն ու անելիքները մարզում դեռ շատ են: Մարզպետը պաշտոնավարման կարճ ժամանակահատվածում 3500 քաղաքացու է ընդունել ու մարզի բազում խնդիրների մասին հենց նրանցից է տեղեկացել:
Հիշեցնենք` ԱԺ արտահերթ ընտրությունը նախատեսված է դեկտեմբերի 9-ին։
