ԵՐԵՎԱՆ, 6 նոյեմբերի — Sputnik. Երևանի գլխավոր ճարտարապետ Արթուր Մեսչյանը խոստանում է 2.5 տարվա ընթացքում իրականացնել «Հին Երևան» նախագծի մի մասը։ Այս մասին նա հայտնեց այսօր հրավիրված ասուլիսի ժամանակ։
Մեսչյանը խոստացավ, որ ոչ մի հին շենք և ոչ մի հուշարձան չի քանդվի։ Բոլոր շենքերը կվերակառուցվեն և կպահպանվեն լավագույն պայմաններում։ Նա հայտնեց, որ արդեն հանդիպել է «Հին Երևան» նախագծի ճարտարապետի հետ և նրա հետ քննարկել այդ հարցը։ Պարզվել է, որ նախագծի իրականացման համար կարելի է օգտագործել հին շենքերի ապամոնտաժումից հետո մնացած քարերի միայն 30%–ը։
«Արդեն խոսել ենք ճարտարապետի հետ և որոշել ենք տեղաշարժել նախագծի իրականացմանը խոչընդոտող ստորգետնյա ավտոկայանատեղին։ Նախագծի իրականացման համար կօգտագործվեն հին շենքերի քարերի 30%–ը, քանի որ ապամոնտաժումն իրականացվել է վայրենավարի», – ընդգծեց նա։
Մեսչյանի խոսքով` ավելի խնամքով է իրականացվել Աֆրիկյանների տան ապամոնտաժումը (պատմական շենքը գտնվել է Տերյան փողոցում)։ Մեսչյանը խոստովանեց, որ ինքն այդ շենքը չէր ապամոնտաժի։
«Երկու տարվա ընթացքում արդեն կտեսնեք վերակառուցման արդյունքները, սակայն նախագիծն ամբողջությամբ ավարտին կհասցվի 4-4.5 տարվա ընթացքում», – ընդգծեց նա։
Գլխավոր ճարտարապետը խոստացավ, որ «Փոքրիկ երգիչների» շենքը (Արամի փողոցում գտնվող պատմական շենք) կվերանորոգվի հարևանությամբ գտնվող բազմահարկ շենքի կառուցապատողի հաշվին։
«Եթե պատասխանատվություն եմ ստանձնել, ապա ես եմ պատասխանատու քաղաքի համար։ Այսուհետև գիտեք, թե ումից պահանջել», – ասաց նա։
«Հին Երևան» նախագիծը Երևանի կենտրոնում մոտ 100 000 քմ տարածք է ընդգրկում` Աբովյան փողոցից մինչև Կողբացի փողոց և Արամի փողոցից մինչև Բյուզանդի փողոց։ Նախագծի շրջանակում նախատեսված է վերականգնել XIX–րդ դարի վերջի, XX–րդ դարի սկզբի Երևանի ճարտարապետական տեսքը։ Ենթադրվում էր, որ «Հին Երևան» նախագիծը պետք է ավարտին հասցվեր 2010-2011 թվականներին, բայց կառավարությունը որոշակի խնդիրների պատճառով միայն 2014 թվականին է պայմանագիր կնքել Multicontinental distribution հետ։ Շինարարական աշխատանքները մեկնարկել են 2017 թվականին։
