Սոցիալական ապահովության Շենգավիթի տարածքային բաժնի պետն ու առաջատար մասնագետը բռնվել են պահանջված կաշառքը ստանալու պահին։
Ինչպես տեղեկացնում են ՀՀ ոստիկանության հասարակայնության հետ կապերի և լրատվության վարչությունից՝ Կազմակերպված հանցավորության դեմ պայքարի գլխավոր վարչության կոռուպցիայի և տնտեսական գործունեության դեմ ուղղված հանցագործությունների հակազդման վարչությունում օպերատիվ տեղեկություններ էին ստացել, որ մի քաղաքացի կենսաթոշակի տարիքը լրանալու կապակցությամբ դիմել է Շենգավիթի տարածքային սոցիալական ապահովության բաժին։
Բաժնի պետ Լևոն Պետրոսյանն ու գլխավոր մասնագետ Աննա Սեդրակյանն ուսումնասիրել են դիմողի փաստաթղթերը և պատճառաբանել, որ նրան չի բավարարում երկու տարվա աշխատանքային ստաժ։ Այս հանգամանքն անտեսելու և թոշակը ձևակերպելու համար նրանք քաղաքացուց պահանջել են 100 000 դրամ կաշառք։
Պահանջած կաշառք ստանալու պահին պետն ու աշխատակցուհին ձերբակալվել են, կաշառքն` առգրավվել։ Դեպքի առթիվ ոստիկանության կազմակերպված հանցավորության դեմ պայքարի գլխավոր վարչությունում հարուցվել է քրեական գործ։
