ԵՐԵՎԱՆ, 5 նոյեմբերի — Sputnik. «Նոր Մարաշ» զինված խմբի առաջնորդ Արթուր Վարդանյանի կողմնակիցները շարունակում են պնդել, որ նա անմեղ է, ինչպես նաև սպառնում են շարունակել բողոքի ակցիաները, եթե իրենց պահանջները չբավարարվեն։
Այսօր Վարդանյանի կողմնակիցները` հասարակական պաշտպան Հայկազ Մակարյանի գլխավորությամբ, բողոքի ակցիա էին կազմակերպել Հայաստանի կառավարության շենքի դիմաց։ Ակցիան տևեց մոտ կես ժամ։ Ակտիվիստները ցրվեցին միայն այն ժամանակ, երբ նրանց մոտ դուրս եկավ Հայաստանի վարչապետի պաշտոնակատարի օգնական Նաիրի Սարգսյանը, որի միջոցով նամակ փոխանցեցին Նիկոլ Փաշինյանին։
«Եթե 10 աշխատանքային օրվա ընթացքում մեզ չպատասխանեն, մենք նորից բողոքի ակցիա կանցկացնենք։ Վարդանյանը նման պայմաններում երկար չի կարող մնալ», – լրագրողների հետ զրույցում ասաց Մակարյանը։
Նրա խոսքով` Արթուր Վարդանյանի խափանման միջոցը պետք է փոխվի, և նա պետք է անհապաղ ազատ արձակվի դատարանի դահլիճից։
Մակարյանը նշեց, որ Վարդանյանը լյարդի խնդիրներ ունի, և նրա վիճակը գնալով վատանում է։ Իրավաբանի համար անտրամաբանական է, որ Հայաստանում հայտարարված լայնամասշտաբ համաներումը չի տարածվում Վարդանյանը վրա։ Նրա խոսքով` երեք տարի է անցել, և քննչական մարմինները մինչև հիմա չեն կարողացել Վարդանյանի մեղավորության ապացույցներ գտնել։
«Փաշինյանը կարող է զանգահարել և կարգադրել, որ այդ գործով անցկացնեն օբյեկտիվ հետաքննություն։ Մենք չենք պահանջում, որ նա օրենք խախտի», – ասաց Մակարյանը։
Հիշեցնենք` 2015թ–ի նոյեմբերին Ազգային անվտանգության ծառայությունը հայտարարել էր, որ վնասազերծել է հանցախմբի 9 անդամների և նրանց ղեկավար Արթուր Վարդանյանին։ Հայտնաբերվել էր մեծ քանակությամբ զենք և զինամթերք։ ԱԱԾ–ն հայտնել էր նաև, որ այդ խումբը նպատակ ուներ ուժի կիրառմամբ զավթել երկրի իշխանությունը։ Այդ գործի շրջանակում 2015թ–ի դեկտեմբերին ձերբակալվել էր պաշտպանության նախկին նախարար Վահան Շիրխանյանը, որին մեղադրում էին զինված խմբին օգնելու մեջ։ Այս տարվա մայիսին իշխանափոխությունից հետո նա ազատ արձակվեց Հայաստանի խորհրդարանի երկու պատգամավորների անձնական երաշխավորությամբ։
