ԵՐԵՎԱՆ, 4 նոյեմբերի –Sputnik. Յուրի Խաչատուրովից հետո ՀԱՊԿ նոր գլխավոր քարտուղար կարող է դառնալ Բելառուսի ներկայացուցիչը։ Այս մասին գրում է «Կոմերսանտ» թերթը։ Սեփական աղբյուրներին հղում անելով` պարբերականը տեղեկացնում է, որ ՀԱՊԿ–ում քննարկվում է Բելառուսի անվտանգության խորհրդի պետական քարտուղար Ստանիսլավ Զասի թեկնածությունը։
Աստանայում նոյեմբերի 8-ին ՀԱՊԿ անդամ երկրների (Հայաստան, Բելառուս, Ղազախստան, Ղրղզստան, Ռուսաստան, Տաջիկստան) ղեկավարները կհավաքվեն հավաքական անվտանգության խորհրդի նստաշրջանին։ Ակնկալվում է, որ վերջակետ կդրվի ՀԱՊԿ նոր գլխավոր քարտուղարի նշանակման հարցում։ ՀՀ վարչապետի պաշտոնակատար Նիկոլ Փաշինյանի մամուլի քարտուղար Արման Եղոյանն օրեր առաջ հայտարարեց, որ գլխավոր քարտուղարի թեման միանշանակ կքննարկվի Ղազախստանի մայրաքաղաքում։
Պարբերականի՝ կազմակերպության երեք երկրների դիվանագիտական աղբյուրներն ասում են, որ ամենայն հավանականությամբ հաջորդ երեք տարին կազմակերպությունը կղեկավարի Բելառուսի ներկայացուցիչը։
Նշենք` այդ պաշտոնը թափուր մնաց, երբ Հայաստանը որոշեց հետ կանչել իր ներկայացուցիչ Յուրի Խաչատուրովին, որն այդ պաշտոնում աշխատել էր 1.5 տարի, նախատեսված 3-ի փոխարեն։
Հիշեցնենք` Խաչատուրովին մեղադրանք է առաջադրվել 2008 թվականի մարտի 1-ից 2-ն ընկած ժամանակահատվածում Երևան քաղաքում տեղի ունեցած իրադարձությունների վերաբերյալ ՀՀ հատուկ քննչական ծառայությունում քննվող քրեական գործով, այն բանի համար, որ նա այլ անձանց հետ նախնական համաձայնությամբ տապալել է ՀՀ սահմանադրական կարգը: Նրա լիազորությունները դադարեցվել էին նոյեմբերի 2-ին։ Հայաստանում այս ընթացքում հայտարարում էին, որ հույս ունեն պահպանել գլխավոր քարտուղարի պաշտոնը։
Նշվում է, որ ՀԱՊԿ–ում ի սկզբանե քննարկվում էր մի տարբերակ, որի համաձայն` մնացած 1.5 տարին գլխավոր քարտուղարի պաշտոնակատար կնշանակվեր գլխավոր քարտուղարի տեղակալ Վալերի Սեմերիկովը։
Սակայն արդյունքում լիարժեք քարտուղար նշանակելու որոշում է կայացվել։ Ընդ որում` որոշվել էր ղեկավարվել ռոտացիայի սկզբունքով, որի համաձայն` այբբենական կարգով Հայաստանից հետո Բելառուսը պետք է գլխավոր քարտուղար նշանակի։
