ԵՐԵՎԱՆ, 31 հոկտեմբերի — Sputnik. Հայաստանը ռուսաստանցի զբոսաշրջիկների համար Նոր տարվա ամենամեծ պահանջարկ ունեցող ուղղություններից է։ Այս մասին գրում է «Կոմերսանտ» թերթը։
Հաշվարկների համաձայն` տոների ընթացքում Հայաստանի ուղղությամբ թռիչքի միջին արժեքը նվազել է 67%–ով, Վրաստանի ուղղությամբ թռիչքի արժեքը մնացել է նախորդ տարվա մակարդակում։
Պարբերականը մեջբերել է Ozon.travel ընկերության առևտրային տնօրեն Ռաուֆ Ռասուլովի ասածը, ըստ որի` հետխորհրդային երկրների շրջանում առավել մեծ է հետաքրքրությունը հատկապես Հայաստանի ու Վրաստանի նկատմամբ: Նման ակտիվությունը պայմանավորված է մեծ մասամբ ավիաչվերթերի համեմատաբար մատչելի գնով ու ոչ մեծ ներքին ծախսերով:
Հարևան Ադրբեջանն էապես զիջել է դիրքերն ու դուրս մնացել ռուսաստանցի զբոսաշրջիկների նախընտրելի ուղղությունների առաջատար շարքից:
Օրինակ` Skyscanner որոնողական համակարգը ֆիքսել է, որ Բաքվի ուղղությամբ չվերթերի առցանց հարցումներն այս տարի նվազել են 78 տոկոսով:
Հիշեցնենք` 2017 թվականի փետրվարից Ռուսաստանի քաղաքացիները կարող են Հայաստան գալ ներքին անձնագրերով։ Օրենսդրական այդ փոփոխության արդյունքում զբոսաշրջիկների հոսքը զգալիորեն աճել է։
