ԵՐԵՎԱՆ, 29 հոկտեմբերի — Sputnik. Ավելի քան 120 ներկայացուցիչներ աշխարհի 80 երկրների կենդանաբանական այգիներից և համանման գիտական այլ կենտրոններից այս օրերին Երևանում են: Մայրաքաղաքի կենդանաբանական այգին այս տարի պատիվ ունի հյուրընկալել Եվրասիական կենդանաբանական այգիների և ակվարիումների միջազգային ասոցացիայի 24-րդ համաժողովը։
Հոկտեմբերի 29-ից մինչև նոյեմբերի 1-ը անցկացվող կոնֆերանսի այս տարվա թեման է վայրի բնության պահպանման ու կենդանիների վերաբնակեցման (ռեինտրոդուկցիա) գործում կենդանաբանական այգիների դերն ու նշանակությունը:
Եվրասիական կենդանաբանական այգիների և ակվարիումների ասոցացիայի (ЕАРАЗА) միջազգային կոնֆերանսի բացումը տեղի ունեցավ Մոսկվա կինոթատրոնում։
Բացմանը ներկա էին բնապահպանության նախարար Էրիկ Գրիգորյանը, Եվրասիական կենդանաբանական այգիների և ակվարիումների միջազգային ասոցացիայի նախագահ Վլադիմիր Սպիցինը, Ճապոնիայի արտակարգ եւ լիազոր դեսպան Ջուն Յամադանը, ՎիվաՍել-ՄՏՍ-ի գլխավոր տնօրեն Ռալֆ Յիրիկյանը, ԱՊՀ, եվրոպական և հարավամերիկյան երկրների պատվիրակներ, կենդանաբանական այգիների տնօրեններ։
Բացման խոսքում Երևանի կենդանաբանական այգու տնօրեն Ռուբեն Խաչատրյանը ողջունելով հյուրերին ասաց․ «Երևանն առաջին անգամ է ընտրվել որպես ԵԱՌԱԶԱ միջազգային կոնֆերանսի հյուրընկալող և բոլորիս համար պատիվ է տարբեր երկրների տարբեր մշակույթների, սակայն մեկ նպատակի շուրջ հավաքված գործընկերներին մեկ հարկի տակ միավորելը։ Իսկ այդ գաղափարը մեկն է՝ մեր մոլորակի վայրի բնության և կենսաբազմազանության պահպանությանը՝ ի շահ մեր սերունդների։ Այս գործում մեծ ներդրում կարող են ունենալ հենց կենդանաբանական այգիները»։
ՀՀ Բնապահպանության նախարարն Էրիկ Գրիգորյանը, ընդգծելով կենդանաբանական այգիների դերը, ասաց, որ դրանք գիտահետազոտական կենտրոններ են, որոնք էական ներդրում ունեն կենսաբազմազանության պահպանման գործում։
Բացման արարողությանը հյուրերը տեսանյութերի միջոցով ծանոթացան, թե ինչ տեսք ունի Երևանի կենդանաբանական այգին վերանորոգումից հետո։ Այդ աշխատանքները արվել են համագործակցելով Երևանի քաղաքապետարանի,Վիվասել ՄՏՍ-ի և Նիդեռլանդների կենդանաբանական այգու հետ։
«Սա իմ առաջին այցը չէ Հայաստան։ Երևանի կենդանաբանական այգում առաջին անգամ եղել եմ 35 տարի առաջ։ Ցավոք Այգին այն ժամանակ վատ տեսք ուներ։ Այսօր այս ֆիլմի միջոցով տեսա, որ այնտեղ մեծ փոփոխությունն են տեղի ունեցել և ունենում։ Մեր Նիդեռլանդների գործընկերները իրենց ներդրումն են ունեցել և ես հույս ունեմ, որ այդ համագործակցությունը կշարունակվի», — ասաց Եվրասիական կենդանաբանական այգիների և ակվարիումների միջազգային ասոցիացիայի նախագահ Վլադիմիր Սպիցինը։
Երևանի քաղաքապետ Հայկ Մարությանի ողջույնի խոսքը փոխանցեց քաղաքապետարանի արտաքին կապերի վարչություն Դավիթ Գևորգյանը․
«Ուզում եմ նշել, որ ասոցիացիան հանդիսանում է կարևոր հարթակ քննարկելու կարևոր հարցեր և արտահայտելու ընդհանուր արժեքները աշխարհի կենսաբազմազանության պահպանման համար։ 2020 թվականին Հայաստանի միակ կենդանաբանական այգին կտոնի հիմնադրման 80-ամյակը։ Այս ընթացքում այն շատ դժվարությունների է բախվել՝ Երկրորդ համաշխարհային պատերազմը, 90-ականների տնտեսական ճգնաժամը և այլն։ Չնայած այդ դժվարություններին, շնորհիվ մեծ ջանքերի և գործի նվիրյալ անձանց՝ կենդանաբանական այգին կարողացավ հաղթահարել շատ խնդիրներ։ Վերջին տարիներին այն դարձել է երևանցիների և Հայաստանի հյուրերի սիրելի վայրերից»։
«Մենք՝ իբրև քաղաքակիրթ երկիր մոլորակի քաղաքացի պետք է միշտ ուշադրության կենտրոնում պահենք մեր միջավայրը և սկսենք մտածել, թե ինչ ենք փոխանցելու ապագա սերունդներին։ Ցանկացած ոլորտի հաջողակ բիզնես պետք է պատասխանատվություն զգա այս հարցում և կանգնի այնպիսի կազմակերպությունների կողքին, որոնք մտահոգված են և աշխատում են շրջակա միջավայրի բարելավման շուրջ», — ասաց կոնֆերանսի հովանավոր ՎիվաՍել-ՄՏՍ-ի գլխավոր տնօրեն Ռալֆ Յիրիկյանը։
Կոնֆերանսի բացմանը Երևանի կենդանաբանական այգու տնօրեն Ռուբեն Խաչատրյանին փոխանցվեց ԵԱՌԱԶԱ կոնֆերանսի դրոշը։
Հանդիսավոր մասից հետո ներկայացուցիչները տեղափոխվեցին արդեն զեկուցումների սրահ, որտեղ մեկնարկեցին խորը մասնագիտական քննարկումները:
Իսկ երեկոյան տարբեր երկրներից ժամանած գիտնականներին սպասում էր հայկական հյուրասիրությունը:
Sputnik Արմենիան համաժողովի ինֆորմացիոն հովանավորն է և առաջիկայում մենք կանդրադառնանք կոնֆերանսի ընթացքին:
Իսկ վաղը հյուրերին սպասում են Երևանի կենդանաբանական այգում, որտեղ նախատեսված են Այգու ավանդական միջոցառումներից երկուսը՝ Դդմի տոնը և Ծղոտե քանդակների օրը:
Կոնֆերանսի կազմակերպիչներն են «Վայրի բնության և մշակութային արժեքների պահպանման հիմնադրամը»՝ ՀՀ Բնապահպանության նախարարության և Երևանի քաղաքապետարանի հովանու ներքո:
Եվրասիական կենդանաբանական այգիների ու ակվարիումների ասոցացիան (ЕАРАЗА) հիմնադրվել է Ռուսաստանի, ԱՊՀ և Բալթյան երկրների առաջատար կենդանաբանական այգիների տնօրենների նախաձեռնությամբ և Մոսկվայի կենդանաբանական այգու հենքի վրա՝ 1994 թվականին:
Այն ժամանակ նման կառույցի ստեղծման նպատակն էր Խորհրդային միության փլուզումից հետո ստեղծված քաղաքական իրավիճակում պահպանել առկա գործնական և գիտական կապերն ու համագործակցության եզրերը:
Ասոցացիան ոչ կոմերցիոն, հասարակական կազմակերպություն է, որը կամավորության սկզբունքով միավորել է կենդանաբանական այգիներ, ակվարիումներ և նմանատիպ այլ գիտական կառույցներ:
Ասոցացիայում միավորված կենդանաբանական այգիների և ակվարիումների գործունեության գլխավոր նպատակը կենդանատեսակների և վայրի բնության պահպանումն ու կայուն զարգացումն է: Սա իր մեջ ներառում է նաև բնության հանդեպ պատասխանատվության ներարկում հանրության՝ մանավանդ նախադպրոցական, դպրոցական տարիքի երեխաների և երիտասարդության շրջանում:
Տեղեկացնենք, որ Երևանի կենդանաբանական այգին հանդիսանում է նաև Եվրոպական կենդանաբանական այգիների և ակվարիումների ասոցացիայի թեկնածու անդամ:
