ԵՐԵՎԱՆ, 29 հոկտեմբերի — Sputnik. Հայաստանում հոկտեմբերի 29-ից նոյեմբերի 3-ն անցկացվող ԱՊՀ երիտասարդ առաջնորդների դպրոցը տարբեր երկրներից ժամանած ավելի քան 70 մասնակից ունի։ Sputnik Արմենիայի թղթակցի հետ զրույցում այս մասին ասաց «Հայ-ռուսական Երիտասարդական Միասնություն» (ՀՌԵՄ) հասարակական կազմակերպության նախագահ, դպրոցի տնօրեն Գոհար Ղումաշյանը։
Մասնակիցները կներկայացնեն իրենց նախագծերը, լավագույն նախագծի հեղինակը 1000 դոլար կստանա։
«Մենք չէինք պատկերացնում, որ այդքան նախագիծ կլինի, 500 հայտ էինք ստացել։ Չէինք սպասում, որ այդքան բարձր մակարդակի կլինեն։ Կարծում եմ` դրանցից 10-12-ը մենք հաջողությամբ ավարտին կհասցնենք։ Ներդրողներն արդեն ասել են, որ պատրաստ են ներդրումներ անել կոնկրետ ոլորտներում»,- ընդգծեց նա։
Դպրոցի ծրագրային մենեջեր, Սիլիկոնյան հովտի լիդերության մասնագետ Ռուզաննա Ատասունցն էլ նշեց, որ Դպրոցի նորարարությունը ոչ թե առաջնորդություն սովորեցնելն է, այլ այն, որ յուրաքանչյուր մասնակից հնարավորություն ունենա հասկանալու, թե ինքն ինչ օգուտ կարող է բերել հասարակությանը։
Միջոցառման ընթացքում փորձագետները «TED Talks» ձևաչափով կներկայացնեն իրենց հաջողության պատմությունները։
«Դպրոցը կարող է ապագա հաջողության խթան դառնալ։ Յուրաքանչյուրը կարող է ձեռք բերել իրեն անհրաժեշտ հմտությունները սեփական նախագիծն իրականացնելու համար։ Գուցե տարիներ անց այս երիտասարդներին մենք հանդիպենք արդեն համաշխարհային առաջնորդների շարքում», — ասաց նա։
Քաղաքագետ և հրապարակախոս Դենիս Դվորնիկովն էլ նշեց, որ 6 օրվա ընթացքում, իհարկե, հնարավոր չէ մարդուն առաջնորդ դարձնել, բայց նախագծի մասնակիցներին կարող են օգնել մոտիվացիայի հարցում։
«Պատմում ենք առաջնորդ լինելու այն նրբությունների մասին, որոնց վրա պետք է ուշադրություն դարձնել։ Անձամբ իմ խնդիրն է, որ այդ երիտասարդներն ավելի լուրջ վերաբերվեն իրենց ասածին և ասելու ձևին», — ընդգծեց փորձագետը։
Նշենք, որ ԱՊՀ երիտասարդ առաջնորդների դպրոցը կազմակերպել է «Հայ-ռուսական Երիտասարդական Միասնություն» (ՀՌԵՄ) հասարակական կազմակերպությունը Ռուսաստանի երիտասարդների հարցերով դաշնային գործակալության, «Ռեսուրսային երիտասարդական կենտրոն», Հայաստանում Ռուսաստանի դեսպանատան և Երևանում գիտության և մշակույթի ռուսական կենտրոնի ներկայացուցչության աջակցությամբ։
