ԵՐԵՎԱՆ, 29 հոկտեմբերի — Sputnik. Վաշինգտոնը կարծում է, որ ՀՀ վարչապետ Նիկոլ Փաշինյանի վարկանիշը թույլ կտա որոշումներ կայացնել հաշվի չառնելով Արցախի ժողովրդի կարծիքը, Sputnik Արմենիա մամուլի կենտրոնում ասաց Պետդումայի ԱՊՀ գործերով և հայրենակիցների հետ կապերի կոմիտեի փոխնախագահ Կոնստանտին Զատուլինը։
Զատուլինը հիշեցրեց Բոլթոնի խոսքերն այն մասին, որ Փաշինյանի բարձր վարկանիշը թույլ կտա նրան որոշակի «հատուկ» որոշումներ կայացնել Արցախի հարցով։
«Բոլորս լսել ենք պաշտոնավարման 100-օրյա առիթով Փաշինյանի ելույթը։ Հիշում եմ, որ նա խոսում էր այն մասին, որ Արցախի ճակատագրի մասին որոշումներ չի կայացնելու առանց մարդկանց հետ խորհրդակցելու և բուն Լեռնային Ղարաբաղի։ Այնուամենայնիվ, Բոլթոնի ելույթից դատելով, ամերիկյան վարչակազմը (գուցե ոչ միայն այն) նման հույսեր ունի», – ասաց Զատուլինը։
ԱՄՆ–ում, ըստ Զատուլինի, կարծում են, որ բարձր վարկանիշ ունենալով՝ ներկայիս կառավարությունն ի զորու է կայացնել այնպիսի որոշումներ, որոնք չէր կարող կայացնել նախկին իշխանությունը՝ գլխավորապես Արցախի հարցով։
Բավականին վտանգավոր իրավիճակ է, և Զատուլինի կարծիքով, հայերը պետք է որոշեն՝ ականջ դնեն տագնապի «շչակների» ձայնին, թե ոչ։
Զատուլինը հիշեցրեց, որ քաղաքական մի շարք գործիչներ «արմունկներն էին կծում» այն բանից հետո, երբ ժողովրդականություն չվայելող քայլեր էին արել՝ հույսները դնելով իրենց վարկանիշի վրա։
Ավելի վաղ անվտանգության հարցերով ԱՄՆ նախագահի խորհրդական Ջոն Բոլթոնը Երևան իր այցելության ժամանակ հայտարարել էր, որ եթե Նիկոլ Փաշինյանը հաղթի ընտրություններում, ապա նա լավ հնարավորություն կունենա վճռական քայլերի դիմելու արցախյան հակամարտության կարգավորման հարցում։
ՀՀ վարչապետի պաշտոնակատարն ի պատասխան ասաց, որ Բոլթոնը չի կարող խոսել իր անունից։ Եվ որ Արցախի հարցը պետք է որոշի Հայաստանի, ԼՂՀ–ի և սփյուռքի ժողովուրդը։
