ԵՐԵՎԱՆ, 27 հոկտեմբերի — Sputnik. Ամեն մեկը կարող է խոսել իր անունից, Ջոն Բոլտոնը խոսում է իր անունից: Այսօր՝ հոկտեմբերի 27-ին, լրագրողներին այս մասին ասաց ՀՀ վարչապետի պաշտոնակատար Նիկոլ Փաշինյանը՝ մեկնաբանելով ԱՄՆ նախագահի Ազգային անվտանգության հարցերով խորհրդական Ջոն Բոլտոնի այն հայտարարությունը, թե ԱԺ ընտրություններում հաղթելուց և վարչապետ ընտրվելուց հետո Փաշինյանը կարող է վճռական որոշումներ կայացնել Արցախի հարցում:
«Ջոն Բոլտոնը և ընդհանրապես որևէ մեկը չի կարող խոսել իմ անունից: Այո, ընտրվելը հնարավորություններ կտա, բայց ես ասել եմ, որ չի կարող լինել որևէ լուծում, որը ընդունելի չի լինի Հայաստանի և Արցախի ժողովուրդների ու Արցախի իշխանությունների համար: Հարցի գլոբալ կարգավորման առումով հասկանում ենք, որ լուծումը պետք է ընդունելի լինի նաև Ադրբեջանի ժողովրդի համար»,-ասաց Փաշինյանը:
Նա ավելացրեց, որ Ղարաբաղի հարցի լուծողը ոչ թե ինքն է, այլ հայ ժողովուրդը։
«Որևէ վարչապետ այսօր կա, վաղը չկա»,,- ասաց նա:
Նշենք, որ ԱԺ արտահերթ ընտրությունները նախատեսված են այս տարվա դեկտեմբերին։
