ԵՐԵՎԱՆ, 26 հոկտեմբերի — Sputnik. Ի տարբերություն Ադրբեջանում արված հայտարարությունների, մեր երկրի հետ ԱՄՆ հարաբերությունների մասին խոսելիս ԱՄՆ նախագահի անվտանգության հարցերով խորհրդական Ջոն Բոլտոնը «ռազմավարական գործընկեր» եզրույթը չի գործածել։
Sputnik Արմենիայի հետ զրույցում, մեկնաբանելով ամերիկացի պաշտոնյայի այցը, ասաց քաղաքագետ Սուրեն Սարգսյանը` հավելելով, որ առաջին անգամ է, երբ ամերիկյան բարձրաստիճան պաշտոնյանի շուրթերից Ադրբեջանի նկատմամբ նման դիրքորոշում է հնչում։
«Միացյալ նահանգների համար տարածաշրջանային կարևորագույն նշանակություն ունեցող պետությունը Վրաստանն է, որովհետև ԱՄՆ–ի հետ ունի օրակարգային ամենախորը հարցերն ու հարաբերությունները, իսկ երկրորդը Ադրբեջանն է, որը նախ նավթային և էներգետիկ ռեսուրսներով հարուստ պետություն է, և երկրորդ` որովհետև Աֆղանստանի ռազմավարության մեջ լուրջ աջակցություն է ցուցաբերում ԱՄՆ-ին»,– ասաց քաղաքագետը։
Ինչ վերաբերում է Հայաստանին, Սուրեն Սարգսյանը հիշեցրեց, որ հայ–ամերիկյան հարաբերություններում լուրջ խնդիր է առաջացրել Սիրիա ուղարկվող կոնտինգենտը, անկախ ՀՀ իշխանությունների հավաստիացումներից, թե այն կրելու է բացառապես հումանիտար բնույթ։
Ջոն Բոլտոնը Հայաստանում հայտարարեց նաև, որ Հայաստանի համար արտաքին ճնշման թուլացման լավագույն միջոցը ղարաբաղյան հարցի լուծումն է, և որ կողմերը պետք է միասին աշխատեն ու համատեղ լուծումներ գտնեն։ Սուրեն Սարգսյանի դիտարկմամբ, այս հայտարարությունը լիովին տեղավորվում է ամերիկյան կողմի` արցախյան խնդրի փոխզիջումային, խաղաղ լուծման դիրքորոշման մեջ։
«Սա մի հայտարարություն է, որի մասին տարբեր ձևաչափերով խոսվել է, նույնիսկ հայկական կողմը դրա վերաբերյալ բանակցություններ է վարել, այսինքն այստեղ ես նոր բան չեմ տեսնում»,– ասաց Սարգսյանը։
Ինչ վերաբերում է Հայաստանի ներքաղաքական իրավիճակին ու դրա շուրջ ԱՄՆ իշխանությունների դիրքորոշմանը, Սուրեն Սարգսյանը հերքեց տարածված կարծիքը, թե ԱՄՆ–ում չեն վստահում ՀՀ նոր իշխանություններին ու Նիկոլ Փաշինյանին։
«Նման բան չկա, Նիկոլ Փաշինյանն ունի վստահություն և՛ Վաշինգտոնում, և՛ Մոսկվայում, և՛ ԵՄ–ում։ Իհարկե, կան նրա քաղաքական թիմում մարդիկ, ում նկատմամբ կան որոշակի վերապահումներ։ Բայց գլոբալ ասել, որ ՀՀ իշխանությունները չեն ընկալվում այս կամ այն երկրի իշխանությունների կողմից, սա ուղղակի սխալ է»,– ասաց Սուրեն Սարգսյանը։
Իսկ այն, որ առաջիկայում նախանշվում Է Ադրբեջանի նախագահ Իլհամ Ալիևի այցը ԱՄՆ, քաղաքագետը սա ևս մեկնաբանում է ԱՄՆ–ի հետ այդ երկրի «ռազմավարական գործընկերային» հարաբերությունների համատեքստում` չբացառելով, որ այցի ընթացքում նաև նոր համագործակցության փաստաթղթեր կստորագրվեն։
