ԵՐԵՎԱՆ, 26 հոկտեմբերի — Sputnik. Փաշինյանի համախոհները մեկ տարի անց կընդունեն իրենց սխալը, եթե համարձակություն ունենան։ Այս մասին այսօր, մեկնաբանելով Ընտրական օրենսգրքի փոփոխությունների պատճառով ստեղծված իրավիճակը, ճեպազրույցի ժամանակ ասաց ՀՀԿ խմբակցության ղեկավար Վահրամ Բաղդասարյանը։
Ավելի վաղ ՀՀԿ-ն բոյկոտել էր ԸՕ փոփոխությունների քվեարկությունը։ Ի պատասխան Փաշինյանը հայտարարել էր, որ փոփոխությունները պետք է հետաքրքրեն հենց ՀՀԿ-ին, քանի որ այդ դեպքում կկարողանա «փրկօղակ» ստանալ ձայների 2%-անոց անցողիկ շեմի տեսքով` 5%-ի փոխարեն և խորհրդարան անցնել։
«Շնորհակալություն, իհարկե, Փաշինյանին, որ մտածում է ընդդիմության մասին։ Բայց թող նրան չթվա, որ մենք գոյություն ունենք ամեն գնով իշխանության ղեկին կամ խորհրդարանում լինելու համար։ Մենք անընդունելի ենք համարում ընտրություններից մեկ ամիս առաջ ԸՕ-ում փոփոխություններ իրականացնելը։ Հայտարարել ենք այդ մասին և մեր կարծիքը չենք փոխել։ Ինչպիսի՞ն կլինի խորհրդարանը, եթե ընտրություններն այդքան հապճեպ անցկացնենք։ Արդյո՞ք այն քաղաքական մշակույթի, քաղաքական քննարկումների վայր է դառնալու։ Այ դրա մասին է պետք մտածել, այլ ոչ թե այն մասին, թե ով 1-2 տոկոս ավել կամ պակաս կստանա», — ընդգծեց Բաղդասարյանը։
Եթե կուսակցությունները համաձայնության գային ընտրությունները 2019 թվականի մայիսին անցկացնելու հարցում, ապա այդ որոշումը հնարավոր կլիներ հայտարարությունով ամրապնդել։ Եվ դա, ըստ Բաղդասարյանի, աշխարհին ցույց կտար, որ ապրիլին և մայիսին տեղի ունեցած դեպքերից հետո, հանրապետության քաղաքական ուժերն ընդհանուր հայտարարությամբ հանդես գալու կամք են գտել իրենց մեջ։
«Իսկ հիմա դուք կտեսնեք, թե ինչ խորհրդարան է ձևավորվելու։ Եվ կտեսնեք, թե արդյոք այն հարիր է ազգային քաղաքականությանը, թե ոչ», — հայտարարեց Բաղդասարյանը։
Հիշեցնենք, որ խորհրդարանական արտահերթ ընտրությունները պետք է անցկացվեն դեկտեմբերին։
