ԵՐԵՎԱՆ, 25 հոկտեմբերի — Sputnik. Ղարաբաղյան հակամարտության կողմերը պետք է ինքնուրույն կարգավորման հասնեն։ Այս մասին Երևանում մամուլի ասուլիսի ժամանակ ասաց ԱՄՆ նախագահի ազգային անվտանգության հարցերով խորհրդական Ջոն Բոլտոնը։
«Խնդրի լուծումը շատ բարդ է։ Եթե այն պարզ լիներ, ապա հակամարտությունը վաղուց կարգավորված կլիներ։ Ես այստեղ չեմ եկել, որ ամերիկյան քաղաքականության մեջ տեղի ունեցած որևէ փոփոխության մասին հայտնեմ կամ նոր լուծումներ առաջարկեմ։ Կողմերը պետք է միմյանց հետ աշխատեն։ Կողմերը պետք է ինքնուրույն լուծում գտնեն», — ասաց Բոլտոնը։
Բոլտոնի նախկին ղեկավարներից մեկը` Ջիմ Բեյքերը, մեկնաբանելով տևական միջազգային հակամարտություններից մեկն ասել էր. «Ոչ ոք այնպես խաղաղություն չի ուզում, ինչպես կողմերը»։ Խորհրդականը հիշեցրեց այդ պատմությունը և վստահություն հայտնեց, որ Հայաստանի համար արտաքին ճնշումը թուլացնելու լավագույն միջոցը ղարաբաղյան հարցի լուծումն է։
Պատասխանելով հարցին, թե ինչ փաստաթուղթ է լինելու բանակցային սեղանին ու ընդհանրապես ինչ կազմով են դրանք անցկացվելու, խորհրդականն ասաց, որ չի ուզում ժամանակից առաջ ընկնել։ Նրա խոսքով` Հայաստանում աջակցում են ԵԱՀԿ Մինսկի խմբի հետագա ջանքերին, ինչը ուրախալի է։
Միաժամանակ կողմերը կարող են ցանկացած հարց քննարկել, ոչ մի սահմանափակում չպետք է լինի։
Նրա խոսքով` եթե վարչապետը (նկատի ունի Նիկոլ Փաշինյանին — խմբ.) հաղթի ընտրություններում, ապա դա ղարաբաղյան հակամարտության կարգավորմանն ուղղված վճռական քայլերի դիմելու լավ հնարավորություն կլինի։
«Մենք պետք է աշխատենք այն ուղղությամբ, որ Ադրբեջանի կողմից նույնպես համապատասխան արձագանք լինի», — ամփոփեց նա։
Ավելի վաղ Հայաստանում ԱՄՆ հեռացող դեսպան Ռիչարդ Միլսն ասել էր, որ վաղ թե ուշ Հայաստանը պետք է հանձնի տարածքների գոնե մի մասը խաղաղ կարգավորման հասնելու համար։
