ԵՐԵՎԱՆ, 25 հոկտեմբերի — Sputnik. Աջ ղեկով ավտոմեքենա չի կարելի ներկրել Հայաստան, և պետք է հետևել օրենքին։ Կառավարության նիստից հետո լրագրողներին այս մասին ասաց ՀՀ տրանսպորտի, կապի և տեղեկատվական տեխնոլոգիաների նախարարի պաշտոնակատար Հակոբ Արշակյանը։
Նա հիշեցրեց, որ մի ժամանակ ինքն էլ ակտիվիստների հետ կողմ է եղել աջ ղեկով մեքենաների ներկրմանը թույլտվություն տալուն։
«Բայց հիմա օրենք է ընդունվել։ Ինչպե՞ս այն շրջանցել, եթե գործող օրենք է», — հարցրեց Արշակյանը։
Նախարարը նշեց, որ օրենքի համաձայն` արգելված է աջ ղեկով ավտոմեքենաները որպես տրանսպորտային միջոց Հայաստան ներկրելը։
Այն հարցին, թե նա դրանով ինչ է ուզում ասել, նախարարը պատասխանեց. «Կարելի է ներկրել որպես պահեստամասեր»։
Այնուամենայնիվ, հիմա նա կարծում է, որ աջ ղեկով մեքենաներ վարել չի կարելի։ Ճանապարհները դրա համար նախատեսված չեն։
«Օրինակ` եթե սովորական ղեկով մեքենան հարված է ստանում հետևից, հայտնվում է մայթին։ Իսկ եթե աջ ղեկով մեքենան է հարված ստանում, ապա այն կարող է դուրս գալ հանդիպակաց գոտի։ Բացի այդ, մեքենայի վրա լուսարձակներն այնպես են կարգավորված, որ լուսավորեն մայթի կողմը, այլ ոչ թե հանդիպակաց գոտու` թե՛ հետիոտներին, թե՛ նշանները տեսնելու համար։ Այսինքն, որպեսզի մեքենան համապատասխանի այդ պահանջներին, պետք է այդ ամենը փոխել։ Իսկ մենք դրա համար չունենք արտոնագրված մասնագետներ։ Ուստի ես չեմ կարող կոչ անել վարորդներին վերազինել իրենց մեքենաները», — ասաց Արշակյանը։
Հիշեցնենք, որ հոկտեմբերի 18-ին ներկրողները փակել էին «Բագրատաշեն» հսկիչ-անցակետը և բողոքում էին աջ ղեկով ավտոմեքենաների ներկրում արգելող օրենքից։
Հայաստանի տրանսպորտի նախարարությունը շարունակում է ոչ նպատակահարմար համարել օրենքում շտկումներ կատարելը, քանի որ 2020թ-ի հունվարի 1-ից արգելք է սահմանվելու «աջ ղեկով» մեքենաներ ներկրելու վրա ԵԱՏՄ բոլոր երկրների համար։ Մաքսային միության «Անվավոր տրանսպորտային միջոցների անվտանգության մասին» տեխնիկական կանոնակարգի համաձայն, մինչև 2020թ-ը ԵԱՏՄ բոլոր երկրներում պետք է արգելվի աջ ղեկով մեքենաների ներկրումը։
