ԵՐԵՎԱՆ, 24 հոկտեմբերի — Sputnik. Երևանի կենտրոնում տեղի ունեցած ճանապարհատրանսպորտային պատահարի մասնակիցներից մեկը Սփյուռքի նախարարի պաշտոնակատարի տեղակալն է։ Facebook սոցիալական ցանցում այս մասին գրել է սփյուռքի նախարարի մամուլի խոսնակ Գրիգոր Գևորգյանը։
«Տեղեկացնում եմ, որ երեկ՝ հոկտեմբերի 23-ին, տեղի է ունեցել ճանապարհատրանսպորտային պատահար ՝ Սփյուռքի նախարարի պաշտոնակատարի տեղակալի մասնակցությամբ: Պատահարի մասնակից չի եղել Նախարարի պաշտոնակատար Մխիթար Հայրապետյանը: Դեպքի վերաբերյալ նախապատրաստվում են նյութեր»,- գրել է նա:
Հիշեցնենք` երեկ Ամիրյան-Զաքյան փողոցների խաչմերուկում խոշոր ՃՏՊ էր տեղի ունեցել. բախվել էին Nissan Qashqai մակնիշի ավտոմեքենան և Kawasaki մակնիշի մոտոցիկլետը։ Նախնական տվյալով` վթարի հետևանքով մոտոցիկլավարը վնասվածքներ է ստացել գլխի և պարանոցի շրջանում։
