ԵՐԵՎԱՆ, 24 հոկտեմբերի — Sputnik. Ազգային ժողովի պատգամավորներից մեկի նկատմամբ քրեական գործ է հարուցվել կաշառքի փաստով: Այս մասին այսօր Ազգային ժողովում հայտնեց ՀՀ վարչապետի պաշտոնակատար Նիկոլ փաշինյանը:
«100 տոկոսանոց ապացուցված գործ է, բայց մենք արդեն 2 ամիս մի պաշտոնական նամակի պատասխանի ենք սպասում: Որ օրը ստացվեց, նախաձեռնություն է լինելու այդ պատգամավորին կալանավորելու»,- ասաց Փաշինյանը:
Ձգձգումը, Փաշինյանի խոսքով, կապված է օտարերկրյա դիվանագիտական ներկայացուցչության հետ:
«Երեք ամիս է` այդ թուղթը չի գալիս»,-ասաց նա:
Թե ով է ձգձգումների մեղավորը` ՀՀ դեսպանատունը, թե տվյալ երկրի իշխանությունը, Փաշինյանը չհստակեցրեց, բայց վստահեցրեց` ինչքան էլ ժամանակ ձգվի, այլընտրանք չկա, պատգամավորը կալանավորվելու է:
«Դա լինելու է երրորդ հանրապետության պատմության ամենախոշոր կաշառքի դեպքը, որն իր թելերով տանելու է էլի խոշոր պաշտոնյաների հետևից»,- ասաց Փաշինյանը:
Նա հայտարարեց, որ կոռուպցիայի դեմ պայքարի հարցում նոր իշխանությունը մեկ միլիմետրի շեղում նույնիսկ թույլ չի տալու:
