ԵՐԵՎԱՆ, 22 հոկտեմբերի – Sputnik. Հայաստանում նախընտրական պայքար է լինելու խորհրդարանում երրորդ կամ չորրորդ տեղի համար։ Այս մասին Հայաստանում Sputnik-ի սեփական թղթակից Էլինա Ղազարյանի հետ զրույցում ասաց ԱՊՀ երկրների ինստիտուտի հայկական մասնաճյուղի ղեկավար Ալեքսանդր Մարգարովը։
Նրա խոսքով՝ կարելի է ենթադրել, որ ապագա խորհրդարանում միակուսակցական մեծամասնություն է լինելու, որը աջակցելու է Փաշինյանին։ Դժվար է ասել, որ կողմերը կզբաղեցնեն մնացած տեղերը ու ով ընդդիմություն կլինի։
«Բավականին հետաքրքիր հարց է, քանի որ բավականին դժվար է լինել Փաշինյանի ընդդիմադիրը՝ հաշվի առնելով լայն հասարակության աջակցությունը։ Մյուս կողմից էլ, լինելով ընդդիմությունում, կարելի է զգալի տեղեր ստանալ խորհրդարանում․ ըստ ներկայիս օրենսդրության՝ ընդդիմությունը ԱԺ-ում մեկ երրորդ տեղ ունի», — ասաց Մարգարովը։
Հարցեր կան կապված Ընտրական օրենսգրքի հետ, որով պետք է անցնեն նոր ԱԺ ընտրությունները։ Նոր օրենսգիրքը կներկայացվի խորհրդարանին, սակայն արդյո՞ք ԱԺ-ն կհասցնի ընդունել այն՝ հաշվի առնելով, որ դրա համար բացարձակ մեծամասնության ձայներն են պետք, դեռ անհայտ է։
Նույնիսկ, եթե ընտրությունները հին օրենսգրքով անցնեն, միևնույնն է ընդդիմություն լինելու է։
«Մենք խորհրդարանում առնվազն երեք կուսակցություն ենք ունենալու», — ասաց Մարգարովը։
Դժվար է ասել, թե արդյո՞ք Փաշինյանը կգնա ընտրություններին «Քաղաքացիական պայմանագրի», թե «Իմ քայլը» դաշինքի շրջանակում։ Փորձագետը կարծում է, որ դա իր համար իմիջի ու տեխնոլոգիաների հարց է։
Ենթադրաբար, ԱԺ կանցնի նաև «Բարգավաճ Հայաստան» կուսակցությունը։ Ինչպիսին կլինի մնացածի ճակատագիրը, այդ թվում ներկայիս խորհրդարանական ու արտախորհրդարանական ուժերինը (օրինակ, «Սասնա ծռեր», Րաֆֆի Հովհաննիսյան) դեռ անհայտ է։
«Պայքար է մղվելու պատվավոր երրորդ ու չորրորդ տեղերի համար», — ասաց Մարգարովը։
Հոկտեմբերի 16-ին Փաշինյանը հրաժարական տվեց վարչապետի պաշտոնից. դա անհրաժեշտ էր խորհրդարանը ցրելու ու դեկտեմբերին նշանակված արտահերթ ընտրություններ անցկացնելու համար։
