ԵՐԵՎԱՆ, 22 հոկտեմբերի — Sputnik. Ռուսաստանի նախագահ Վլադիմիր Պուտինը Վալդայսկի ֆորումի ժամանակ ելույթ ունենալիս ընդգծել է ռուսական միջուկային դոկտրինում կանխարգելիչ հարվածի իրավունքի բացակայությունը։ Դրախտի մասին ասվածն այլաբանություն էր։ Այս մասին ասել է ՌԴ նախագահի մամուլի քարտուղար Դմիտրի Պեսկովը` մեկնաբանելով Պուտինի ասածը։
Հոկտեմբերի 14-ին Պուտինն ասել էր, որ եթե Ռուսաստանի դեմ միջուկային զենք կիրառեն, ապա «մենք, որպես նահատակներ, դրախտ կընկնենք, իսկ նրանք ուղղակի շունչները կփչեն»։
«Խոսքը գլխավորապես ոչ թե դրախտի ու այն մասին էր, թե ով ուր կընկնի։ Խոսքն այն մասին էր (և դա էր գլխավորը, ինչը շատերը բաց են թողել), որ Ռուսաստանը դոկտրինի մակարդակով իրեն կանխիչ հարվածի իրավունք չի վերապահում», — այսօր Պեսկովն ասել է լրագրողներին։
Նա ընդգծել է, որ Ռուսաստանն առաջին միջուկային հարված հասցնելու իրավունք իրեն չի վերապահում։ «Բայց մենք երկու պայման ունենք։ Այս ամենի մասին այլ, ավելի բովանդակալից բառերով ասել է նախագահը։ Մեր դոկտրինում գրված է, որ եթե, տարբերակ 1, մեզ վրա միջուկային զենքի կիրառմամբ հարձակվեն, և 2, այնպես հարձակվեն, որ մեր պետության գոյությունը սպառնալիքի տակ լինի, ապա Ռուսաստանը իրեն միջուկային զենքը կիրառելու իրավունք է վերապահում», — շարունակել է ՌԴ նախագահի մամուլի քարտուղարը։
Պեսկովը վստահեցրել է, որ Ռուսաստանը երբեք առաջինը չի հարձակվի։
