ԵՐԵՎԱՆ, 22 հոկտեմբերի – Sputnik. Ընտրական օրենսգրքում կառավարության առաջարկած փոփոխությունների նախագիծն այսօր` հոկտեմբերի 22-ին, չընդունվեց խորհրդարանում: Նախագծի ընդունումը տապալվեց 54 կողմ, 3 դեմ ձայներով:
Բանն այն է, որ որպես սահմանադրական օրենք Ընտրական օրենսգիրքը փոփոխությունների կարող է ենթարկվել պատգամավորների թվի առնվազն 2/3-ի ձայներով: Այսինքն` ԱԺ 63 պատգամավոր պետք է կողմ քվեարկեին նախագծին:
Ի դեպ, նիստին գրանցվել էր 69 պատգամավոր, որոնցից 12-ը, փաստորեն, քվեարկությանը չմասնակցեցին:
Նշենք, որ մինչ այդ «Ելք» խմբակցության ղեկավար Լենա Նազարյանը ԱԺ նախագահ Արա Բաբլոյանի` քվեարկության մասին հայտարարությունից հետո 20 րոպե ընդմիջում պահանջեց` այսպիսով քվեարկությունը հետաձգելով ևս 20 րոպեով: Ընդմիջում պահանջելու պատճառը, թերևս, դահլիճում ներկա պատգամավորների ակնհայտ անբավարար թիվն էր:
Հիշեցնենք` մինչ այդ ՀՀԿ-ն հայտարարել էր, որ կողմ չի քվեարկելու նախագծին: ԱԺ փոխնախագահ Արփինե Հովհաննիսյանն էլ չէր բացառել, որ խմբակցության դիրքորոշումը կարտահատվի ոչ միայն դեմ քվեարկելով, այլև քվեարկությանը չմասնակցելով: Մյուս երեք խմբակցությունները` «Ելք» և «Ծառուկյան» դաշինքներն ու ՀՅԴ-ն, հայտարարել էին, որ կողմ են նախագծին:
Խորհրդարանում ուժերի դասավորությունն այս պահին հետևյալ տեսքն ունի` ԲՀԿ-ն ունի 31 մանդատ, «Ելքը»՝ 9, ՀՅԴ-ն՝ 7, ՀՀԿ-ից առանձնացած պատգամավորները 18-ն են: Միասին դա հավասար է 65 ձայնի: Ավելի վաղ հիմնական զեկուցող արդարադատության նախարարի պաշտոնակատար Արտակ Զեյնալյանը հարցի քննարկումից հետո կառավարության անունից առաջարկ էր ներկայացրել ԸՕ նախագծի առաջին ընթերցմամբ քվեարկությունը նշանակել ժամը 17:30-ին, որպեսզի պատգամավորները հնարավորություն ունենան մինչ այդ ներկայանալ նիստին։
