ԵՐԵՎԱՆ, 19 հոկտեմբերի — Sputnik. Վարչապետի պաշտոնակատար Նիկոլ Փաշինյանը քաղաքացիներին հորդորում է ամեն պատճառով փողոցները չփակել, հարգել նաև մյուսների ազատությունը:
Այս մասին Փաշինյանը հայտարարել է Կապանում և վստահեցրել` կառավարությունը պատրաստ է լսել բոլորին:
«Ամենակարևոր ձեռքբերումը մեր ազատությունը, օրինականությունը, ժողովրդի իշխանությունն է: Բայց իմ համոզմունքն այն է, որ մենք պետք է շատ խնամքով վերաբերենք մեր ազատությանը, պետք է ոչ թե ցածրացնենք դրա արժեքը, այլ բարձրացնենք: Հայաստանում բանը հասել է նրան, որ հարևանը մի ճանապարհ է փակում, մյուսը` մեկ այլ: Ով ինչ խնդիր ունի, ճանապարհ է փակում: Սա, անկեղծ ասած, այնքան էլ ընդունելի չէ»,-ասել է Փաշինյանը:
Նա նկատեց` ինքն այն մարդն է, ում հորդորով փակվել էին Հայաստանի բոլոր ճանապարհները, սակայն նաև նշեց` եթե 10 անգամ փողոց է փակել, հազար անգամ ներողություն է խնդրել բոլոր քաղաքացիներից, ում անհարմարություն է պատճառել, բացատրություն է տվել ու ստացել է ժողովրդի թույլտվությունը:
«Մեկին չես թողնում օրենք խախտի, ճանապարհ է փակում: Կան, իհարկե, բազմաթիվ քաղաքացիներ, որոնք արդարացի պահանջներով են փակում: Բայց միթե կառավարությունը հրաժարվում է ձեզ լսել` առանց ճանապարհ փակելու: Դուք ունեք խաղաղ հավաքներ անելու իրավունք: Ուզում եք ասել ձեր ասելիքը, բարձրաձայնեք և ձեզ կլսեն»,- վստահեցրել է Փաշինյանը:
Նա հիշեցրել է, որ այսօր Հայաստանի լրատվամիջոցներն ազատ են առավել, քան երբևէ: Փաշինյանը նշել է` եթե մարդիկ հարց բարձրաձայնեն, ողջ մամուլը լուսաբանելու է:
Նա կրկին շեշտել է, որ Հայաստանում պետք է լինի փոխադարձ հարգանքի մթնոլորտ:
